Gastunan di overtaim pa e añanan 2018, 2019, 2020 i 2021, pa protekshon di mandatarionan.

WILLEMSTAD – Kontraloria General a deskubrí durante su investigashon di kantidat di oranan ku miembronan di Kuerpo Polisial Kòrsou ta traha mas tantu ku planiá (Overwerk Politie), ku protekshon di Ministernan tambe ta muchu karu. E Ministernan ta risibiendo protekshon mas haltu ku e nivel básiko i riba un base struktural, sin ku ta determiná di antemano si esaki ta nesesario. Ta papia di gastunan entre 2 mil i 10 mil florin pa luna.

Ademas, semper nan ta usa e mesun personanan. “E kombinashon di faktor akí ta hiba na relativamente hopi overtaim di parti di e personal di seguridat. E gastunan di overtaim ta pisa riba presupuesto di KPC (Kuerpo Polisial Kòrsou, red.), sin ku a tene kuenta ku nan riba presupuesto i sin ku KPC tin niun influensia riba kuantu ora di overtaim ta wòrdu trahá. Ta asina ya ku no ta informá ni pidi KPC di antemano pa e overtaim tuma lugá. Na 2018 i 2020, e gastunan akí di overtaim a suma 0,8 mion florin pa aña i na 2019 i 2021, respektivamente 0,6 mion i 1,2 mion florin pa aña. Komo promedio, e gastunan di overtaim pa kolaboradó pa luna a suma entre 2.598 florin i 9.475 florin.”

Segun Kontraloria General, no tin sufisiente posibilidat pa tene e gastunan di overtaim pa protekshon di mandatario bou di kòntròl. “Na tur, den kada un di e añanan 2018, 2019, 2020, a laga 18 kolaboradó di KPC sirbi pa brinda seguridat na mandatario. Na 2021, a trata akí di 21 kolaboradó. Lei ta preskribí un nivel básiko di seguridat pa minister. Ora tin un menasa plousibel, por tuma medida di seguridat adishonal. Segun KPC, e ministernan ta risibiendo protekshon mas haltu ku e nivel básiko i riba un base permanente. Ademas, segun KPC, nan ta usa semper e mesun kolaboradónan. E kombinashon di faktor akí ta resultá den un nivel relativamente haltu di overtaim.”

Lòs di esei, KPC no ta risibí aviso ni petishon pa esaki di antemano. P’esei, ta te despues e kuerpo ta hañ’é konfrontá ku e deklarashonnan di overtaim i e gastunan haltu menshoná. Kontraloria a inkluí un tabèl den e informe riba kua por mira e gastunan di overtaim pa e añanan 2018, 2019, 2020 i 2021. “Ta buk e gastunan akí riba presupuesto di Hustisia, sin pasa e gastunan akí pa e ministerionan korespondiente despues, manera e Raadsbesluit di 14 di desèmber di 2016 (2016/007591) ta eksigí.”