Parlamentario Mc William durante su splikashon.

PUNDA – Komishon Sentral di Parlamento a deliberá tokante e konsepto di lei pa kambia e Ordenansa di órden públiko, den e sentido ku ta prohibí uso di saku di plèstik i bakinan di material sintétiko (polystreen), ku por usa solamente un biaha.

Miembro di Parlamento Giselle Mc William, ku ta inisiadó dje proyekto di lei, a duna un aklarashon di e proyekto akí durante di e reunion i a splika ku e lo adaptá e konsepto pa inkluí e produktonan ei tambe. Despues miembronan di Parlamento a haña e oportunidat pa hasi pregunta durante e úniko tanda. Na final Komishon Sentral di Parlamento a bai di akuerdo pa formulá un relato final dje preguntanan, ku Mc William lo kontestá por eskrito. El a anunsiá di lo manda un nota di kambio pa Parlamento. Mc William a kuminsá traha riba e proyekto di lei for di 2014. Asina el a splika. Den e promé proposishon di lei a bin ku e idea pa hinka produktonan di plèstik den e lei yamá “Warenlandsverordening”, pero esaki tabata dirigí riba plèstik usá den e kadena di komestibel. Pero riba konseho di Raad van Advies frakshon di MAN a disidí di regla e prohibishon den e Ordenansa di órden públiko.

Frakshon di MAN en general i su lider Mc William partikularmente a risibí elogio di Parlamento kompleto pa a bin ku e inisiativa. Un reunion ku a kana riba un nivel altu, ku interes general komo ophetivo prinsipal sin tiramentu di lodo, sin bochincha ni ken a hasi kiko promé òf ken a bin ku e idea. A enfoká riba pueblo. I a zundra pueblo tambe práktimamente.

“Sèt di hende porko ta biba riba e lugá akí!” Esei tabata e liña kòrá pa loke ta trata e opinion di Parlamento tokante e sushedat ku tin riba nos isla bunita, ku asta turistanan ta reklamá. Echo ta tambe ku sierto turista mes tambe ta yuda susha e pais, despues di sigui ehèmpel di yunan di tera, tirando nan sushi abou sin mas òf keda sin kue nan sushi ku no a alkansá drenta den e kliko. Pero simplementa introdusí un lei i keda sin kontrolá ku ta kumpli ku esaki tambe ta un problema di Kòrsou. Esaki tambe a bin dilanti durante e reunion. I esei mester traha riba dje.

Aparte di esaki, lo mester bai traha tambe riba konsientisashon di pueblo. Pasó e echo ku hende ta haña mashá nòrmal pa kaba di kumpra algu, kome i bebe esaki i habri porta di outo por ehèmpel i tir’e gewon riba suela i dal porta sera kore bai, ta algu ku simplemente no por. E problema akí ta algu di tur tempu na Kòrsou te ku tin kansionnan manera “Changa e Porko” di Darwin Gregg ku a bira popular na Kòrsou. E ta keda un problema.

Proyektonan di limpiesa na Kòrsou ta manera hiba awa laman. Pasó ta kaba di limpia i siguiente dia mes e ‘porkonan’ a bai tira sushi atrobe na e mes kaminda ku prensa a saka foto bunita i mustra kon limpi a keda. Un proposishon di miembronan di Parlamento ta tambe pa introdusí e asina yamá “statiegeld”, ku ta un un suma chikí ku e konsumidó por risibí pa produktonan di plèstik entregá bèk pa por ehèmpel resiklage, manera “Kunukuman” a bin ta hasi. Mc William lo bai kontestá tur pregunta por eskrito i manda pa Parlamento.