Kòntròl: Alexandra van Huffelen, luna pasá di bishita pa tende e.o. salario di ámtenar i kostonan públiko.

Punda—Gobièrnu di Hulanda, mediante di Pakete di Pais, ta insistí pa tene salario di ámtenar bou di kòntròl. Esaki mediante e fórmula di Public Wage Bill den kual ta keda stipulá ku e nivel makro di salario nashonal di ámtenar, no mag surpasá 10% di e Produkto Nashonal Brutu.

E “public wage bill” ta un standardisashon pa mantené un bahada struktural salario den sektor públiko i suavisashon di e kondishonnan di trabou pa e sektor.  Gobièrnu di Kòrsou, firmando, ta di akuerdo  pa introdusí e sistema tambe na Kòrsou. E tarea ta forma un parti integral di e Pakete di Pais. Segun Hulanda, e gastunan di sektor públiko di Kòrsou ta demasiado haltu kompará ku e área di Karibe.  Esaki pasobra e “public wage bill” di Kòrsou ta demasiado haltu, den otro palabra ámtenarnan ta kobrando demasiado sèn.

Mediante Pakete di Pais, Gobièrnu di Kòrsou a firma pa baha e salarionan kolektivo di ámtenar te na 10% di e Produkto Nashonal  Brutu Interno di Kòrsou. Esaki ta un norma den área di Karibe, segun e dokumento. Pa tal motibu e meta prinsipal ta pa baha e nivel di kosto den sektor públiko, entre otro salario. Si tabata nèt despues di Covid, e Public Wage Bill lo tabata un problema pasobra kálkulonan lo ta indiká un baha di kasi 120 mion florin den bolsa di ámtenar, lokual ta igual na kasi un baha pro medio di 3000 florin pa kada ámtenar mensual. Kòrsou su kostonan mensual di salario pa un ámtenar ta pro medio 14.500 florin mensual.

Riba e punto aki Hulanda a kompará ku un ámtenar na Hulanda ta kosta gobièrnu ménos kompará ku Kòrsou. E nivel di salario kolektivo anual di ámtenarnan na Kòrsou ta haltu kompará ku Hulanda. Na Hulanda 14% di lokual e por kobra na impuesto ta bai na pago di ámtenar. Na Kòrsou e kota ta na 31%, lokual ta indikativo di ta haltu, aló ménos esei ta lokual Hulanda ta presentando dilanti for di 2019. Durante 2024, por spera mas preshon di Hulanda pa mishi ku saku di ámtenar. Hulanda ta paga un suma di kasi 35 miar euro na salarionan anual di ámtenar miéntras nan ta kobrando por medio 243 miar euro na impuesto. Na Kòrsou e suma di salario entre 2020 pa 2022 a varia di entre 475 mion florin pa 520 mion florin miéntras e suma di anual di kobra impuesto promé ku Covid tabata alrededor di 1.5 miar florin. E sifranan ta indikativo ku Kòrsou ta pagando mas di su sènnan kobrá na salario di ámtenar kompará ku Hulanda.  Esei ta eksklusivo indeksashon. 31% di lokual Kòrsou generá na impuesto pa aña ta bai pa finansiá salarionan di ámtenar. Kòrsou pro medio ta generá kasi 1.5 miar na impuesto kual ta for di impuestonan dirèkt i indirèkt. For di 1.5 miar anual na  entrada, entre 475 pa 520 mion ta bai na pago di salario lokual ta 31%.

Pero, lokual tambe ta na fabor di e ámtenar ta ku e Produkto Nashonal Brutu di Kòrsou a krese. Esei ta tene e efekto di Public Wage Bill abou, permitiendo Kòrsou di por yega na 520 mion anual na salario. E Produkto Nashonal Brutu na balor nominal, di Kòrsou na 2023 a desaroyá i yega na 5.9 miar florin. Esaki ta lokual ekspertonan bankario na CBCS, Banko Sentral a konfirmá durante un rueda di prensa na Skalo. Esaki ta un sifra hopi haltu, lokual ta un bon desaroyo pa e kota di debe nashonal, kual entretantu a baha tambe yega na 69%. Pero kalkulativo, ta nifiká tambe ku e Public Wage Bill su efekto di 10% ta yega na 590 mion florin na salario kolektivo pa ámtenar.