WILLEMSTAD,—-Tabata mardugá di djabièrnè ku a drenta e tristu notisia ku e legendario lider di “Scouting i alabes e popular Hopman ku ta señor Frendsel “Pappy”Lacruz a bandoná e mundu aki.

Den mes rosea mester bisa ku “Pappy Lacruz”,den pasado tabata presidente di “Fundashon Karnaval Banda Bou”pa 12 aña largu i tambe ta asina ku su karera artístiko a kuminsá den mundu di teater huntu ku su aktu primu ku tampoko no ta forma parti di e mundu aki mas ku ta Anthony Jamanika.

E notisia di fayesementu di “Pappy Lacruz” a sakudí primeramente pueblo di Banda Bou prinsipalmente bario di Dokterstuin,pero tambe e mundu di “Scouting” i mundu di farándula di tantu teater i karnaval ku “Pappy Lacruz” a duna su aporte 100% na dje.

Mester bisa ku aña pasa “Pappy Lacruz” tabata invitado den e programa di farándula “Den Do Mayó” na kanal 13,kaminda ku e konta su historia pa promé i último bes den su bida. Ta trata aki di un historia ku a pone hopi hende ku a wak e programa su wowonan yena ku awa,paso ta trata aki di un historia real,kaminda ku “Pappy” a konta kon su kerida Mama i dos famia serka di dje a pèrdè nan bida durante di un aksidente di outo práktikamente dilanti di nan porta di kas i tambe e la konta ku na aña 2003 dòkter a bisé ku e no tin mas ku 5 aña mas di bida,”Pappy Lacruz a bisa durante di e entrevista ku loke ku doktor a bisé ta 20 aña pasa.

Pero djabièrnè último señor Dios a manda yama Angel Pappy Lacruz serka dje. Forsa ta bai na Kasa,yunan i nietu,ruman nan i famia nan,pero tambe tur habitante nan di Dokerstuin i pueblo di Banda Bou den su totalidat i mundu di “Scouting” di rondó mundu di e gran pèrdida di Frendsel “Pappy”Lacruz i ku “Pappy Lacruz” sosegá na Pas den brasa di señor.