Willemstad,– “Entrante djárason, 19 di mei, trùknan di pan lo por ofresé servisio na un orario un poko mas lat. E orario ta bira entre 6’or di atardi pa 10’or anochi i nan por sirbi kliente solamente pa medio di entrega na kas òf “curbside pickup”.

Restorant
Entrante djárason awor, 19 di mei, bo tin e posibilidat pa disfrutá un poko mas largu na un di nos restorantnan lokal. Nan por kuminsá sirbi klientenan paden tambe, pero ta pèrmití máksimo 4 persona na un mesa òf personanan ku ta biba den mesun kas. Ora ta sinta paden, klientenan no por keda mas largu ku 2 ora konsekutivo den mesun restorant. Restorantnan por sirbi klientenan te 10’or anochi.

Kasino
Ta posibel atrobe pa dibertí un ratu den kasino entrante djárason awor, 19 di mei 2021. Pues kasinonan por bolbe habri, pero te 10or anochi. Tur kasino mester tene kuenta i apliká palabrashonnan i protokòlnan ku a keda akordá ku gobièrnu dia 22 di febrüari.

Sine
Nos por bolbe bishitá un sine. Gobièrnu di Kòrsou a hasi palabrashonnan konkreto ku sinenan lokal, kon pa atendé ku reglanan di distansia físiko i higiena den e establesimentunan di moda ku e eksperiensha por ta mas sigur posibel pa kada bishitante. Nan por keda habri te 10’or anochi i mester tene kuenta ku protokòlnan ku a keda akordá.

Aglomerashon na kas
Entrante djárason, 19 di mei, ta posibel organisá enkuentronan privá ku un máksimo di 10 persona na kas. Nos tur ta sinti falta di sosialisá i pasa ratunan plasentero huntu ku nos ser nan kerí. Si huntu nos sigui kuida, pronto esaki lo ta posibel atrobe ku gruponan mas grandi tambe. Fiesta I aktividatnan ku músika duru, NO ta ser pèrmití ainda, solamente músika di fondo ta ser pèrmití.

Eventonan den salanan
Awor tin e posibilidat pa bolbe organisá entre otro kasamentu, resepshon òf enkuentronan di negoshi. Esaki ta posibel teniendo kuenta ku tur medida vigente pa loke ta e kapasidat máksimo di e eventonan akí, palabrashon tokante músika i mas ku klaro medidanan di higiena i distansia sosial.
Durante e eventonan aki, por risibí máksimo 50% di e kapasidat total di e fasilidat te ku un máksimo di 50 persona. Teniendo kuenta ku mester mantené sufisiente distansia entre esnan presente i solamente por tin músika di fondo.