WILLEMSTAD – Monumentenzorg a kuminsá ku e restorashon di residensia anterior di famia De Windt na Consciëntiesteeg 61-63. Djabièrnè aki e kontratista BWM N.V. a selebrá e punto mas haltu di e konstrukshon ku un bríndis. E edifisio a sufri daño signifikante den temporada di áwaseru na 2020. E fachada i e skina sùitwèst a frakasá. Pa evitá ku e edifisio na Otrobanda lo a bai pèrdí kompletamente, Stichting Monumentenzorg Curaçao a kumpr’é na febrüari 2021 i a kuminsá ku e rekonstrukshon di emergensia mes ora.

E meta prinsipal di rekonstrukshon di emergensia ta pa stabilisá e edifisio, pa asina evitá deterioro adishonal. Medio aña despues ku e daño a tuma lugá, a selebrá e punto di mas haltu na e sitio di konstrukshon. Despues di hopi aña Consciëntiesteeg por a wòrdu habri atrobe pa peaton.

For di e momentu ei a traha duru pa sera finansiamentu pa hasi un restorashon kompletu. A logra kuminsá ku e restorashon na ougùstùs 2023 ku yudansa finansiero di Stichting Monumentenfonds Curaçao. Monumentenzorg ta enkargá ku e dunamentu di trabou i ta hasi e supervishon. Bouwbedrijf Willemstad Curaçao ta ehekutá e obranan.

Te ainda no a disidí riba e funshon nobo di e kas, pero lo tene kuenta ku e uso históriko. Semper ta tin espasionan komersial parti abou, i espasionan pa estadia riba e promé piso. Den Consciëntiesteeg, tambe konosí komo Hanch’i Bientu, Monumentenzorg tin diferente otro edifisio, ku ta wardando nan bùrt pa restorashon, entre otro e famoso ‘Moda de Paris’ i un kas ku tabata di famia de Lannoy.

“E proyektonan ta situá na sitio hopi visibel, banda di e viadùkt”, segun Marcel Dennert, direktor di Monumentenzorg. Despues ku e restorashon ta keda kla, Hanch’i Bientu lo bira un entrada atraktivo di e aria de Rif, kaminda tantu hende lokal i bishitantenan por diskubrí e nèchi hanchinan aya tras. “Nos deseo ta pa asina duna un pida bunita di Otrobanda un impulso saludabel, i nos ta orguyoso ku nos por kontribuí na kompartí e kuentanan i historia di e edifisionan aki ku e siguiente generashonnan”.   

E kas di famia De Windt ta biba den memoria di hopi Yu’i Kòrsou. E tanchinan De Windt tabata biba ariba, i nan ta tin un tienda di komestibel abou. Akinan por a kumpra ‘ham di pasku’ henter aña. Na banda di e viadùkt tambe ta tin algun espasio komersial, entre otro un barberia. Na e otro banda di e hanchi ta tin e famoso tienda di tela i tayer di kose paña ‘La Moda de Paris’.