Segun parlamentario Girigorie, Ministerio públiko a rekonosé ku tin echonan kastigabel den e kaso aki i promé minister i Patrick Newton ta responsabel.

Punda,– Parlamentario pa partido PAR, señor Quincy Girigorie  ta splika ku e novela ta kontinuá i ku el a haña sifra di e estafa ku a tuma lugá i ku komunidat mester komprondé ku for di ougùstùs tin  2.7 mion dòler riba lomba di komunidat. 

A sera kontrakt ku CPR kendenan a paga 3 luna i despues no a paga nunka mas i tòg despues gobièrnu a prolongá kontrakt i laga nan sigui traha na Bullenbaai sin paga ni un depchi.

Girigorie ta splika ku pa kolmo promé minister a bini parlamento i bisa ku nan ta paga 2.2 mion florin pa luna kaminda a bin resultá den korte ku for di òktober aña pasa nan no a paga mas.

E ta bisa pues ku ta mentira tras di mentira.

E ta splika ku hinter e kapítulo a bira mas kla i ku ta un estafa di marka mayó a tuma lugá i RDK a sinta mira i koperá pa esaki a tuma lugá.

Girigorie ta bisa ku el a tene su kurason ora ku el a lesa e rapòrt i no ta komprondé kon promé minister ta bisa ku el a deklará lokual nan a bisé i ku e mes no a lesa e kos. Girigorie ta bisa ku ta hopi grave pa e kosnan aki tuma lugá bou di promé minister Pisas.

Girigorie ta bisa ku e kier duna tempu i posibilidat pa promé minister splika e kos aki. E ta bisa ku ta paga promé minister pa e por informá su mes, lesa dokumentonan i pues e kier komprondé ta kon e kos aki a bai. A konfia promé minister ku a primintí ku e ta bai habri refineria i hasta a bai ku sindikatonan pa selebrá e echo ku Bullenbaai a habri, pues e kier sa ta kiko ta kiko.

Promé minister no a lesa, paso el a bisa ku el a papia lokual nan a bisé. “Ami kier sa ta kiko ta kiko”, asina Girigorie a bisa.

E ta bisa ku e informashon tabata konosí sin resultado di korte. E situashon ta sumamente grave i promé minister ta kompletamente responsabel polítikamente, pues mi kier dun’é espasio pa e bin splika kon e ta mira e partisipashon den e kos aki.

Girigorie ta sigui splika ku ta 15 mion di e pueblo aki mester a wòrdu paga i ta mas ku 30 mion CPR a traha riba lomba di e pueblo aki. Si gobièrnu por a haña e fondo aki lo por a hasi diferente otro kos, entre otro baha e preis di gasolin ku pueblo ta pagando. A ninga di laga e kompanianan ku fondo hasi esaki i a laga CPR hasi pa gana sèn riba lomba di e pueblo aki.

Segun parlamentario Girigorie, Ministerio públiko a rekonosé ku tin echonan kastigabel den e kaso aki i promé minister i Patrick Newton ta responsabel, meskos tambe e ta bisa ku ministeraad ta ko- responsabel i awor e kier bai mira si parlamento tambe ta bira ko responsabel den e debakel aki.

RdK mes por a hür ku otro hende pero nan a  disidí ku nan no ta hasié ku otro hende ku no ta CPR i pa un motibu òf otro gobièrnu a opta pa laga CPR komo un estafado traha e sèn riba lomba di e pueblo aki. “Esei ta e chanchuyo, e estafa ku a tuma lugá”, asina Girigorie a bisa.