Willemstad,– Quincy Girigorie parlamentario pa PAR a bisa durante reunion públiko ku e tabatin i tin speransa ainda ku e parlamento aki lo a kuminsá riba un pia diferente kompará ku esun anterior. E ta bisa ku sinembargo ora el a lesa  e punto di agènda, e ta haña ku ketu bai tin e mentalidat di nan kontra nos.

Señor Gigigorie ta bisa ku e persepshon insialmente kreá na inisio di e reunion ta, ku nos ta lucha pa e salu di pueblo, i nan ta pensa di habri sin tene kuenta ku nada. E ta bisa ku e persepshon aki ta robes i e ta gradisí e parlamentarionan ku a bisa ku gobièrnu a hasi un bon trabou ku e parti di pandemia. E ta bisa ku internashonalmente a keda rekonosé ku mas lihé tuma medida pa baha kontagio, mas lihé e pais por lanta su parti ekonómiko.

“Ta importante pa no lubidá ku ta gran parti di mundu a tuma pasonan kasi idéntiko ku Kòrsou, pues no ta for di dede gobièrnu a chupa pa sera pueblo. No ta bèrdat ku kier a sera hende den kas, ta bèrdat si ku gobièrnu a tuma pasonan meskos ku vários pais pa manehá e pandemia i pa kuida salu di pueblo”, asina parlamentario Quincy Girigorie a duna di konosé ayera.

E ta bisa ku por diskutí ki ora a tuma medidanan i frakshon di PAR ta habri pa diskutí riba esaki. Señor Girigorie ta bisa ku lógikamente a evaluá e situashon ekonómiko finansiero i a introdusí un pakete.

E ta bisa ku balansa ta nesesario pa no atendé ku e pashènt i e muri despues debí na e tratamentu.

Segun e parlamentario ta splika ku gobièrnu mas ku tres siman pasa a anunsiá ku dia 17 di mei lo anunsiá medidanan di deskalashon, pues no ta pa asuntu di niun lèkmentu di niun moshon.

E ta bisa ku frakshon di PAR a yama e reunion paso tin separashon di poder. Parlamento no tin poder pa dirigí pais diario. E ta bisa ku frakshon di PAR a invitá promé minister, paso e poder ehekutivo ta den poder di gobièrnu.

E ta bisa ku e desishon pa akseptá e desishon di PAR tabata unu responsabel pa parlamentu por a hasi su trabou. Sin gobièrnu den e reunion, lo a bira un tiramentu di palabra entre parlamentario pa parlamentario.

“Gobièrnu a anunsiá medida di de eskalashon i esei sigur ta mustra aun mas ku mester a invitá gobièrnu”, asina parlamentaruo Girigorie a trese dilanti.

E ta pidi gobièrnu di Kòrsou pa informá parlamentu kua ta e pasonan di suavisashon ku gobièrnu a anunsiá i tambe e kier sa dikon no a skucha pa habri tur área pareu. Señor Quincy Girigorie kier sa tambe si gobièrnu di Kòrsou tin siguiente lockdown plania kaba i si ta si, pa ki tempu esaki lo ta.