WILLEMSTAD – Komishon Sentral a bai di akuerdo ku e konsepto di Presupuesto di Parlamento di Kòrsou pa aña 2025. E miembronan di Parlamento a reuní djamars tokante e konsepto akí. E Parlamentarionan a haña e oportunidat pa hasi pregunta relashoná ku e tópiko, durante e úniko tanda ku tabatin.

Despues ku grefir di Parlamento Silvin Cijntje a kontestá e preguntanan, Parlamento a bai di akuerdo. Lo mester ratifiká esaki den un Reunion Públiko, promé ku e bai pa gobièrnu inkluí esaki den e Presupuesto di pais Kòrsou pa 2025.

E Presupuesto pa 2025 a ta un tiki mas abou ku esun di 2024. A aprobá e Presupuesto, stipulando un suma di 21.8 mion florin, na lugá dje suma original di 22.2 mion florin. E kambio akí ta inkluí entre otro un bahada di diferente gastu, manera di entre otro ‘Kontribushon i Miembresia’, debí na pago di debe bieu di kontribushon na Parlatino. E pòst ‘Komishonnan’ tambe tin un bahada signifikante di kasi mei mion florin. Esaki den gran parti ta debí na e finalisashon dje trabounan di e komishon di enkuesta HNO e aña akí.

Durante e reunion tabatin hopi pregunta di parti di miembronan di Parlamento tokante diferente gastu. Cijntje a kontestá tur pregunta i despues di esaki Komishon Sentral a bai di akuerdo ku e presupuesto kalkulá. Ainda mester trata kálkulo akí durante un Reunion Públiko di Parlamento. E aprobashon di esaki mester tuma lugá promé ku 1 di mei. Despues ta manda esaki pa Ministerio di Finansa. I despues gobièrnu lo inkluí esaki den e proyekto di lei dje Presupuesto pa pais Kòrsou mes pa aña 2025.