Den futuro siudadanonan i tambe organisashonnan lo tin ku kumpli ku normanan mas estrikto teniendo kuenta ku naturalesa i medio ambiente.

Willemstad, — Komishon Sentral lo trata e lei di Kalidat di Airu den sala di parlamento den luna di mart.

Ta konosí ku e Lei di Kalidat di Airu (Lei di Molèster/Hinderverordening) lo mester oumentá e supervishon riba polushon. Adaptashonnan den Lei di Molèster/ Hinderverordening ta indiká un kresementu di importansha pa loke ta trata supervishon i ehekushon di leinan ku ta protehá medio ambiente. E Lei di Molèster di pais Kòrsou ku ta na vigor aktualmente ta sirbi pa protehá medio ambiente kontra di aktividatnan ku ta trese peliger, forma un estorbo i òf kousa daño pa medio ambiente. Ana Maria Pauletta a duna di konosé ku Lei di Molèster ta na vigor awor aki, i ku e Lei di Kalidat di Airu lo ta e  promé di su sorto pa Kòrsou.

Pues e Lei di Kalidat di airu ta enserá diferente puntonan ku a ser adaptá di e Lei di Molester pa asina oumentá supervishon riba polushon. Adaptashonnan ku a keda identifiká den e lei tin di haber ku entre otro supervishon i ehekushon di e Lei di Molèster. E aktividatnan ku ta ser konsiderá komo malu pa medio ambiente, ‘mileubelastende activiteiten’ ta aktividatnan kousá dor di un persona i òf un entidat ku ta trese peliger, forma un estorbo i òf kousa daño pa medio ambiente. Na kuminsamentu di Februari Javier Silvania i Gilmar Pisas a hasi entrego di e lei aki na parlamento.

Konsehero Sosio-Ekonomiko (SER) a komentá anteriormente ku e adaptashonnan hasí pa oumentá supervishon di parti di Inspectie Volksgezondheid ta un stap dilanti importante ya komo ku e adaptashonnan ku lo a keda hasí lo fomentá supervishon i ehekushon di e lei ku  ta na vigor pa protekshon di naturalesa i medio ambiente. Pues gobièrnu tin meta pa implementashon efisiente di leinan riba e tereno di salubridat públiko, medio ambiente i tambe naturalesa. Den futuro siudadanonan i tambe organisashonnan lo tin ku kumpli ku normanan mas estrikto teniendo kuenta ku naturalesa i medio ambiente.

Algun punto kardinal ku e lei aki ta trata ta:

1. Introdukshon di  normanan general pa kalidat di airu na Kòrsou. Den e lei ta duna un deskripshon di tur e tipo di materialnan den airu ku ta wòrdu midí i tambe e normanan ku gobièrnu ta stipulá;
2. E normanan pa kalidat di airu ta bai forma parti di e investigashon ku ta wòrdu hasí ora ku ta otorgá pèrmit di molèster (hindervergunning);
3. Ta bai bini un lei mas ku ta bai stipulá e eksigensianan pa loke ta emishon (pues loke ta visibel ku ta sali for di pipanan di fábrika òf otro aktividat ku ta kousa molèster);
4. Ta bai hasi posibel pa por adaptá e leges mas fleksibel;
5. Ta bai adaptá e Lei di Molèster i e Lei di Inspekshon di salubridat pa aktualisá esakinan i hasi ku ta bira mas fásil pa aktua ora esei ta nesesario;
6. E kategoria di multa tambe ta wòrdu oumentá.