Inisio: segun un rapòrt ku Refineria di Kòrsou, tabata Colas B. kende a inisiá i kordiná e proseso di soborno.

Punda—Un biaha mas, maneho selektivo di Ministerio Públiko ta un diskushon. E biaha aki ta trata di e kaso Lacerta, unda 4 yu di Kòrsou a risibi kondena i djabièrnè último a keda enkarselá. Pero e funshonarionan di un kompania Count, kendenan a inisiá e proseso riba intentonan di soborno, hamas a risibi un persekushon.

Na dado momentu, abogadonan defensor di e 4 yunan di Kòrsou, promé ku e tratamentunan den korte a inisiá, e demandá pa skucha e promé minister di e temporada ei, Eugene Rhuggenaath. Esaki tabata nesesario pasobra, unu dje representantenan di e kompania internashonal, Count Energy kual funshonarionan tambe a partisipá den e trayekto apart, tabata esun kende a bai notifiká Promé Minister Eugene Rhuggenaath. Atraves di e notifikashon, Rhuggenaath i Hunta di Komisario na RdK a bai entrega keho na Ministerio Públiko pa investigá korupshon durante e trayekto pa yega na un sosio pa RdK na 2018.

E investigashon di Ministerio Públiko a sirkulá rondó di e yunan di Kòrsou so. RdK a laga e kompania investigativo Ivy, traha un rapòrt di e suseso unda e rapòrt klaramente ta indikativo ku tantu e funshonarionan na RdK komo esnan di Count a partisipá riba e trayekto no ofishal. Pero tòg, Ministerio Públiko no a pèrsigui e dos funshonarionan di Count.

Por ehèmpel unu dje empleadonan, Kinburn a deklará tantu den e rapòrt di Ivy Corporate komo na wes komisario. Kinburn ta konfirmá, na 3 okashon, ku e idea pa trese sosionan ruso via di PDVSA a bini for di representantenan di Count Energy, miéntras nan di RdK, no tabata di akuerdo ku esaki. Segun Kinburn, el a tende di e idea aki pa promé biaha riba un djadumingu, 26 di ougùstùs 2018. Despues ku Refineria di Kòrsou, a laga Count kai den nan negoshashon, kual negoshashon a tuma lugá pafó di e trayekto ofishal, un representante di Count, Colas B., a manda yama K pa un kombersashon personal. Ta trata di e hòmber Colas B. segun K. Segun e representantenan di Count, e venezolanonan di PDVSA tabata harmando un truko. Riba 26 di ougùstùs 2918, ku tabata un djadumingu, Kinburn a drenta su outo i kore bai ofisina di Count. Na yegada, e representante a bis’é pa nan bai sinta den un kamber diferente, pasobra tabatin ofisina kual e no tabata konfia. E situashon tabata asina deskonfiá, ku e representante di Count a lòk e porta den nan propio ofisina!.  Einan unu dje representantenan di Count a splik’é ku PDVSA ta negoshando ku e rusonan pa trese krudo Kòrsou. Segun Count, Embahador Ulandes na Venezuela a manda un karta pa Promé Minister Rhuggenaath, pa evitá ku e rusonan drenta ku krudo Kòrsou, via un kortina venezolano.

Kinburn a sigui deklará na investigadónan di Ivy, ku na e momentunan ei, Count, òf aló ménos representantenan di Count ya tabatin un otro konekshon rusiano, kual segun nan si tabata konfiabel i no esun ku e embahador a referí Rhuggenaath riba dje. E representante di Count, sintá den ofisina di Count na Kòrsou a konfirmá na Kinburn: “mi konosé rusonan konfiabel dispuesto na bai guera ku PDVSA”.  Seguidamente, e representante di Count a invitá Kinburn pa drenta e dil huntu kuné. Aparte di Kinburn, tur e demas yunan di Kòrsou a deklará ku kontra di Colas B. i tambe Jeffrey B., sin nunka Ministerio Públiko a inisiá un persekushon.