Willemstad—Djadumingu awor 12 di novèmber Komunidat Rastafari ta bai tin un aktividat interesante pa komunidat. E biaha aki e aktividat lo bai ta den sentro di bario Seru Papaya.

Den kuadro di konmemorashon 160 aña abolishon di sklabitut, e komunidat ta trese charla kombiná ku musika pa informa i konsientisa  ariba otro realidatnan ku tin.
Komunidat Rastafari lo presenta e charla musikal ku titulo: TULA KU SELASSIE, na honor di fecha di koronashon di Su Mahestat Imperial Haile Selassie.
Komunidat Rastafari a bin ta organisa aktividatnan informativo/edukativo kombiná ku presentashonnan musikal for di Novèmber 2022 manera, Haile Selassie Coronation Day, charla over di Honorabel Marcus Garvey – fundadó di U.N.I.A. i ACL, African Liberation Day, fecha natal di H.I.M. Haile Selassie i awor Tula Nobo.
Presentashonnan djadumingu awor aparte di e speechnan lo ta di entre otro, musikonan di Komunidat Rastafari, baile di Vali- “Si laman por a papia”, grupo di baile modèrno “Flawless”, banda di reggae-dancehall “Exited”. Tin espasio tambe pa esun ku ke presentá ku rèpnan positivo.
E aktividat na e sentro di bario Seru Papaya lo ta di 3 or di atardi pa 7 or di anochi. Hinter komunidat i speshal esnan di Seru Papaya, Seru Fortuna, Fortuna i besindarionan ta invitá. Entrada lo ta gratis. Bini unu bini tur ku un vibrashon positivo. Pa info por tuma kontakto ku Ras Asurara na 6663486.