Prueba robo: artíkulo den e revista Politico, unda ta tilda ku fuel oil Venezolano den tankinan na Bullenbaai, a forma parti di un robo estatal.

Bullenbaai—Den seno di Refineria di Kòrsou, tin insistensha pa e fuel oil den tankinan di Bullenbaai, tòg bai destaho. Esaki ta lokual representantenan di e kompania estatal petrolero a duna di konosé na Vigilante.

Kontrali na Refineria di Kòrsou, Lead Group entretantu a duna di konosé di e bende e fuel oil i Curaçao Refinery Utilities ta bai risibi e pagonan di hür atrasá. E problema di e fuel oil den tankinan di Bullenbaai, for di inisio di 2023 a kuminsá bira un problema. Ta trata di un fuel oil kontrabanda i probablemente hòrtá for di PDVSA sin nunka e kompania di Venezuela a risibi pago pa e entrega na Kòrsou.

E dos kompanianan estatal, CRU i RdK, ámbos a koperá konsientemente pa laga e fuel oil hòrtá for di  Petroleo Corporation, UPC a hòrta mas ku 500 mion dòler di kombustibel i produktonan petrolero for di PDVSA. E kompania tabata uza militarnan den ehérsito di Venezuela pa saka krudo for di PDVSA i bende riba merkado pretu. E fuel oil den tankinan na Bullenbaai, tambe tabata fuel oil hòrtá sin e dokumentashonnan legal di por a sali for di Venezuela. Pero e kompania entretantu a bai bankarota i direktornan a keda pèrsigui i enkarselá.

E bankarota di United Petroleo komo propietario di e fuel oil, a laga na promé instante Knob Trading pa manehá e kargamentu di fuel oil, balorá na entre 22 mion pa 40 mion dòler. E kompania, United Petroleo Corporation tabata doño di e kargamentu di 496 mil bari di Fuel Oil. Ta trata di e kargamentu di Fuel Oil, ku Bullenbaai a almasena komo nan promé kargamentu kordiná pa Caribbean Petroleum Company, ku entretantu tambe a spat fo’i otro.

Tantu Refineria di Kòrsou komo Curaçao Refinery Utilities no a hasi e diligensha nesesario pa averiguá si e fuel oil tabata prosedente for di un kompania ladron. Un simpel sondeo riba internèt, mes tabata sufisiente pa averiguá ku e kompania tabata gaña ku PDVSA debe nan i ku PDVSA ta bai paga ku e fuel oil.  Segun un konseho hurídiko prosedente di e bufete, InterJuris na Miami, UPC a risibi e kargamentu di fuel oil, komo pago di un debe. UPC tabata un kompania di Panamá i supuestamente tabata doño di e kargamentu. Pero, pa UPC por a logra pone e fuel oil den tankinan na Bullenbaai, nan a uza e kompanianan CRU di Kòrsou, Caribbean Petroleum di Kòrsou i un kompania mas, Knob Trading SA, KTSA. Segun e abogadonan na Miami, e krudo ku UPC a risibi no tabata propiedat di Venezuela ni tampoko di PDVSA, sino tabatin un kambio den propiedat na momento a transferí e kargamentu for di teritorio venezolano. Ademas PDVSA tabata debe UPC, pa un suma deskonosí, pero e kargamentu a kanselá parti di e debe. Inter Juris a duna un konseho robes, pasobra despues PDVSA a hasi kehonan penal unda a resultá otro. E kompania tabata hòrta krudo for di Venezuela.

For di e struktura por a konkluí ku e kompania UPC, registrá na Panama a traha ku kompanianan di Kòrsou pa saka krudo for di Venezuela den un struktura di debe. Gobièrnu di Kòrsou ni tampoko Parlamento di Kòrsou, no tabata na altura di e struktura i no a laga hasi un “compliance report” riba e kompania panameño, promé di e laga un kompania estatal di Kòrsou traha kuné. Ta resultando awor ku UPC, no ta eksistí mas.

E akusashonnan ta serio, pasobra for di e struktura pa entregá fuel oil na Bullenbaai, dos kompania estatal a partisipá na korupshon. Ta trata di na Refineria di Kòrsou i Curaçao Refinery Utilities. Segun e struktura pa entrega Fuel Oil na Bullenbaai, Knob Trading a ofresé su servisionan na United Petroleo Corporation (UPC), kual último tabata un kompania privá i tabata “supuesto” kréditor di PDVSA. Segun UPC, PDVSA tin un debe mionario serka nan. UPC a risibi, komo un pago di debe, un kantidat di “zeta” prosedente di Venezuela. Segun e lista di kargamentu di e tènker Colon, tabata trata di 496 mil bari di (42 galon) di Fuel Oil, konsigna pa PDVSA S.A.., ku a drenta Kòrsou. Ta sospechando ku e fuel oil a sali Venezuela sin aprobashon di e kanalnan ofishal venezolano i alabes sin lisensia di OFAC.