GIRONA – Durante fin di siman tras di lomba e kampionato di futbòl spañó, LaLiga, a kontinuá i ku e resultadonan di fin di siman e tòp klup spañó Real Madrid a logra su di 36 título di Spaña.

Primeramente tabata e klup blanku ku ta logra un viktoria den oranan trempan di djasabra último ganando ku skor di  3-0 di e klup Cádiz ku golnan di Brahin Diaz, Jude Bellingham i Joselu.

Un resultado ku sigur a sorprendé djasabra último tabata e di dos viktoria di e klup Girona FC, revelashon di e temporada aktual di LaLiga, ku skor di 4-2 kontra e tòp klup spañó Barcelona FC. Ku e viktoria aki Girona ta habri siman na di dos lugá den LaLiga.

Otro logro impreshonante di e klup Girona FC ta e echo ku pa promé biaha den nan historia i despues di apénas kuater temporada den e divishon máksimo na Spaña, nan ta sigurá nan partisipashon di forma direkto den Champions League.

Esnan ku a skor pa Barcelona FC tabata Andreas Christensen i Robert Lewandowski (p), miéntras ku Artem Dovbyk i Miguel Gutiérrez kada un a skor un gol pa Girona FC i Portu a skor dos gol.