WILLEMSTAD,—-For di Hulanda Vigilante Farándula a keda poné na altura ku e kantante Reinier “Reintje Rock” Lijfrock ta bai graba un komposishon huntu ku Elton-John Sophia ku ta un kantante urbano, i ku no ta un deskonosí den mundu di farándula lokal.
E grabashon lo mester tuma lugá otro siman, paso no ta un sekreto ku e plan tabata pa e kantante Reinier presentá djasabra binidero na Hulanda huntu ku agrupashon musikal Claudius Philips i su Grupo Oreo, pero e presentashon a keda kanselá.
Pues e kantante Reinier Lijfrock, no ta na Hulanda mas otro siman pa por a hasi e grabashon huntu ku e kantante Elton-John Sophia.
Vigilante Farándula a hiba un kombersashon ku e kantante Elton-John Sophia, kaminda ku el a duna di konosé ku tempu a bira moderno i no ta un sekreto ku teknologia ta asina amplio ku ta pone ku grabashonnan por tuma lugá sin ku e kantante mester ta presente. Mas aleu Elton-John Sophia a indiká ku e ta hasi su parti di grabashon na Hulanda i Reinier Lijfrock ta hasi su parti di grabashon na Kòrsou i pa na final e bosnan bai den un studio di grabashon aki na Hulanda, kaminda ku e trabou final ta bai kaba di tuma lugá. ”Despues e piesa lo bai na tur radio emisora i tambe na djnan i lokutornan. Esaki ta loke ku tin poné riba mesa pa ku e grabashon ku ta bai tuma lugá. Titulo di e piesa ta “Niun no por stima” i e areglo ta den man di Darrel Pinedo”.