Rooseveltweg—E Tim di Homisidio enkargá pa investigá e asesinato di Boechi Windster, siman pasá a bolbe bai na e sitio di delito riba Rooseveltweg.

Tabata den oranan di mèrdia riba djabièrnè último ku spesialistanan den investigashon forensiko a bolbe presentá na e sitio unda Boechi Windster a bin fayesé. Manera ta konosí riba, 9 di desèmber último, deskonosínan a los bala dirigí riba e artista reper konosí komo Boechi Windster. Un kantidat di 3 proyektil a bin alkansá e popular kantante, kual unu a perforá su kurason kousando su morto.

E Tim di Homisidio enkargá ku e investigashon entretantu a skucha diferente testigu i tambe trata na averiguá kon leu grabashonnan di vidio na e tiendanan El Sultan i tambe Welcome Shop por a yuda, pero te ainda e grabashonnan no a duna muchu informashon.

Entretantu a keda konstatá, ku e asesino di Windster nunka no a baha fo’i e vehíkulo for di kual e tirunan a sali. Esaki ta poniendo investigadónan riba pista ku en todo kaso ta trata di un “asesinato” i no un homisidio, den sentido ku por tabatin un plan adelantá pa asesiná e artista. I tambe probablemente a uza un shofùr i “get away” car konsientemente i planiá pa kometé e akto.

Manera Vigilante a publiká i despues konfirmá tòg pa polis, a konfiská un vehíkulo di un miembro di kuerpo, pero despues a resultá ku e vehíkulo no tabatin relashon ku e morto di Windster. Komo kontesta polis a splika ku “tabata un konfushon ku a keda aklará”.  E Tim di Homisidio ta trahando duru riba e kaso i ta tratando na konektá e hechosnan i deklarashonnan na otro.

Riba djamars 12 di desèmber 2022 a hasi un outopsia riba e kurpa sin bida di Windster. Abase di e rapòrt i opservashon físiko, e Tim di Homisidio ta tratando na averiguá for di kua ángulo e tirunan a sali kual a alkansá e artista mortalmente. Un kantidat di tres tiru a alkansa e artista, kual unu a pasa dor di su kurason. Mirando e direkshon ku e vehíkulo a kore bai i lokual testigunan a deklará, reshèrshinan ta sospechá ku no ta e shofùr dje vehíkulo por a los a tirunan riba Windster. Chèns ta grandi ku djabièrnè último, esei tabata tópiko di deliberashon na momento a bai bek e sitio di delito.