Veredikto: si e veredikto di korte na final keda na bou di 300 mion florin, ta surgi un diskrepansha grandi entre kálkulonan di korte i esnan di CBCS i Gobièrnu di Kòrsou

Gorsiraweg– Tantu e komishon instalá pa minister Javier Silvania, komo sekretario di estado Alexandra van Huffelen, a keda sin konsiderá e tratamentunan den korte sivil riba Ennia. E komishon, a menshoná esei spesífikamente tambe di a ekskluí demandanan den korte.

Esei por bira un fayo grandi den konsiderashonnan riba e suma ku tantu Silvania komo van Huffelen ta dispuesto pa konsidera e Resolushon Ennia.  Es mas, ta imposibel konsiderá un fiansa, sin sa kontenido di e tratamentunan sivil, pasobra simplemente Banko Sentral tin beslag riba un kantidat di aktivo, kual ta hasi e suma di e Resolushon ménos di 1.2 Miar florin Ya kaba, e Tribunal di Tres Wes den Apelashon a duna indikashon ku e claim lo ta ménos di 1.1 miar i ta na 270 mion florin.

Banko Sentral a keda sin menshoná den korte kiko e daño di Ennia lo bira, despues ku nan rekuperá e aktivonan kual korte a aprobá pa imponé beslag. Ta trata di sigur, beslag riba akshon a  den Kirby Corporation, depósitonan kèsh ku tabata riba kuentanan di kas invershonista Merril Lynch i finalmente tambe posibel benta di Mullet Bay, inkluso The Towers. Anto ainda mester keda determiná si Hushang Ansary a uza aktivonan den bolsa di Ennia pa transferí akshon den Nabors Industries, un otro invershon mas di Grupo Ansary- Parman.

Ta konosí ku tantu Parman International komo Banko Sentral a apstené di bai mas profundo den korte riba invershon nan di Hushang Ansary. No solamente den Kirby Corporation sino tambe den un di dos kompania, Nabor Industries, no tabatin detaye di e invershon.

Un mihó bista riba e balor di ámbos invershon, por trese un mihó komprondementu dikon òf kuantu sèn Kòrsou mester bai fia òf finansiá pa Ennia.  Un grupo di yu di Kòrsou kombiná  ku representantenan estado unidense mester a pone nan firma bou di dokumentonan ofishal pa Hushang Ansary por a trese kambionan den su bolsa di invershon. E bolsa di invershon tin un balor kuantioso i parti di esaki ta bou di beslag pa Banko Sentral.

Entre yüni 2017 pa òktober 2017, Hushang Ansary a opta pa trese un kambio den su konstelashon di invershon. Pa por a logra esaki, tur direktor huntu ku nan apoderadonan den e konsorsio di Ennia na Kòrsou i Parman na Estádos Unídos mester a firma. Segun dokumentashon ofishal di e Komishon Estado unidense ta trata di representantenan na Ennia Caribe Holding, EC Investments BV, Parman International BV,

EC Investments International Sarl (Luxemburgo), Parman Capital Group LLC,  Parman Enterprises LLC, Kirby Corporation (USA). Den un di dos dokumentashon di kambio serka e grupo di invershon, mester a firma direktornan i representantenan di Parman, Ennia Caribe i tambe di Banco di Caribe huntu ku Banco di Caribe Investments BV.

E intenshon di Hushang Ansary entre 2017 pa 2018 tabata pa trese kambio den su bolsa di invershon. Ta trata di dos interkambio konfirmá pa Reuters. 13 di septèmber 2017 Hushang Ansary a raportá un tomo pasivo di 8.8% den Kirby Corporation. I riba 6 di novèmber 2017 Reuters ta anunsiá  ku Ansary, un biaha mas ta raportá un tomo pasivo di 6.7% den Nabors Industries. Nabors ta balorá na 2.2 bion dòler. Dokumentashon den poder di Vigilante, ta indiká ku pa ambos tomo pasivo por a tuma luga, mester tabatin firma di tantu direktornan lokal di Ennia i di Banco di Caribe. Na 2018 tambe a finalisá algun transakshonnan pa Kirby. I na 2018 mes, Banko Sentral a logra haña kòntròl riba e akshonnan di Kirby.