Willemstad – Projectteam Toezicht & Handhaving (PTH) di Ministerio di Trafiko, Transporte i Planifikashon Urbano (VVRP) a bin ta ehersé diferente trabou den e 2 simannan tras di lomba.

PTH a atendé ku un gran kantidat di kaso manera entre otro di:

– pasamentu di ‘erfgrens’,

– dùmpmentu ilegal di sushi riba tereno di gobièrnu,

– laga kita kònteiner butá ilegalmente riba tereno di gobièrnu,

– konstrukshon ilegal esta sin e pèrmit di konstrukshon nesesario,

– ponementu di sushi riba kaminda públiko,

– posibel uso ilegal di tereno di gobièrnu,

– kontrol di bòrchi di propaganda riba via públiko,

– kobamentu pa saka greis,

– trahamentu di pir,

– derecho di bisiña pa loke ta fluho di áwaseru, i

– peliger di derumbe di muraya,

Kaminda PTH a bin topa ku trabounan ku ta tumando lugá di forma ilegal, mesora a para e operashonnan aki i tuma akshonnan nesesario ku trahadó i/òf doñonan ku tabata presente. Ta pone un bòrchi di atvertensia na sitionan kaminda a konstatá ilegalidat. PTH ta aploudí tambe personanan ku PTH a topa ku si ta kanando konforme regla.

PTH a kontrolá den diferente área manera Steenrijk, Cas Cora, Koraalspecht, Sta Rosa, Cas Grandi, Brakkeput Abou, Emancipatie Boulevard, Fuik, Saliña, Buena Vista, Sta Maria, Mundu Nobo, Charo, Jandorèt, Las Almas, Marchena, Caracasbaai, Nueva Esperanza, Ronde Klip, Zapateer, Montaña i Trai Seru.

PTH lo sigui vigilá i ta hasi un apelashon na komunidat pa konstruí na òrdu pa garantisá propio seguridat, i no usa di tereno di gobièrnu sin e dokumentonan nesesario. Pa por tuma kontakto ku PTH i/òf raportá un posibel kaso di konstrukshon ilegal òf okupashon ilegal di tereno, por yama na 465-1477