WILLEMSTAD – Korte di Promé Instansia a disidí resientemente pa disolbé un kontrakt di trabou entre e Supermarcado Luz B.V., konosí komo Goisco i un empleado. Goisco a hasi e petishon pa terminá e relashon laboral ku e bewaker, paso el a traha pa un otro kompania durante su periodo di malesa.

Ya durante un sentensia anterior na febrüari último, Goisco a haña e tarea pa demostrá ku e hòmber a traha komo bewaker anochi na e klup nokturno Grand Central riba 28 di ougùstùs di aña pasá. Goisco finalmente a entregá prueba tantu por eskrito komo deklarashonnan di testigu, inkluyendo un rapòrt di un empleado. Den e rapòrt ta deskribí detayadamente ku e hòmber a ehekutá trabounan ku ta típiko pa un trahadó di seguridat.

Ademas dje rapòrt, Goisco a entregá tambe dokumentonan ofisial di Banko di Seguro Sosial (SVB) ku ta konfirmá ku no opstante di ta deklará inkapasitá pa traha (AO), el a traha na Grand Central. E formulario di mutashon di 6 di òktober 2022 ta indiká ku e hòmber a traha komo ‘security’ durante e periodo di 1 di ougùstùs te ku 31 di ougùstùs 2022. E direktor dje klup nokturno mes tambe a konfirmá ku e hòmber a traha 3 siman p’e. E testigu a testiguá den sala di Korte, konfirmando e kontenido di su rapòrt. Esaki a kombensé Korte ku Goisco a demostrá ku e hòmber di bèrdat a traha riba e fecha menshoná. Korte a husga ku por konsiderá e komportashon dje hòmber komo un fayo grave, pasó el a traha pa un otro lugá durante su periodo di malesa. Pa e motibu akí, no por ferwagt rasonabelmente di Goisco pa mantené e kontrakt di trabou. Korte a aprobá e petishon di Goisco pa disolbé e kontrakt. Korte a kondená e hòmber tambe na paga e gastunan di e prosedura den Korte, inkluyendo pa grefi i salario di abogado, ku ta suma 5.450 florin. Korte a rechasá tur petishon adishonal.