Den e tabèl, por mira kua ta e partinan ku Inspur mester a entregá den fase 1 i 2 i kiko Ministerio di Hustisia lo mester a (laga) hasi adishonalmente den kada fase.

WILLEMSTAD – Presidente di Parlamento a konvoká un reunion di Komishon Sentral pa dia 27 di sèptèmber próksimo, pa deliberá ku Kontrolaria General tokante e rapòrt ‘Cameratoezicht’ (supervishon ku kámara di vigilansia). E reunion ta planiá pa kuminsá 9’or di mainta, i kada Parlamentario tin 10 minüt di tempu pa hiba palabra.

E rapórt di desèmber 2020 ta negativo. Kompilando Kontrolaria General ta bisa ku no a realisá e proyekto na tempu ni kompleto. No a realisá e proyekto di forma efektivo. No tabatin un preparashon minusioso pa e proyekto. Ainda no ta kumpli ku e rekisitonan legal pa por implementá vigilansia ku kámara di un forma efektivo. Debí na e retraso den ehekushon di e proyekto, ainda no a realisá e ophetivo-/resultadonan deseá di e vigilansia ku kámara na un manera óptimo. No por kompletá e proyekto denter dje presupuesto reservá.

T’asina ku dia 10 di ougùstùs aña pasá e ministernan di Hustisia i di Tráfiko, Transporte i Planifikashon Urbano (VVRP) a instalá un grupo di guia i di trabou yamá ‘Stuur- en Werkgroep wetgevingstraject(en) en implementatie bestuurlijke handhaving cameratoezicht’, pa medio di un dekreto nashonal. E grupo di guia ta integrá pa e ministernan di Hustisia i VVRP, i nan tin entre otro e tarea di supervisá marcha di e trayekto. E grupo di trabou ta formá pa diferente representante di e ministerionan di Hustisia i VVRP, un representante di SOAB i un hurista legislativo.

E grupo di trabou mester formulá, den un plaso di seis luna, un plan di aserkamentu pa e trayekto i raportá mensualmente i por eskrito na e grupo di guia tokante marcha di e trayekto. E grupo di guia ta reuní ku e grupo di trabou un biaha kada dos luna pa monitoriá e trayekto. E dekreto nashonal ta indiká ku e grupo di trabou lo duna atenshon entre otro na e puntonan ku, segun Kontrolaria a konstatá, mester keda reglá ainda den lei relashoná ku responsabilidat pa plachi di number i e opshon pa apliká lei atministrativo ora ta trata di infrakshon di tráfiko (e asina yamá lei Mulder).

Pa loke ta trata e lei di Reino ku mester bini pa protekshon di dato personal, aktualmente e paisnan di Reino ta formulando esaki den un grupo di trabou di e diferente paisnan, ku partisipashon di DWJZ representando Kòrsou. Kontrolaria a hasi Minister di Hustisia 8 rekomendashon den e rapòrt. “Mirando e situashon ku a konstatá relashoná ku e proyekto, laga fase 3 tambe, esta, evaluashon di e proyekto, tuma lugá mas pronto posibel, pareu ku e trayekto di legislashon ku a start na ougùstùs. Di e manera ei, lo por tuma un desishon fundamentá tokante marcha di e proyekto i kon lo sigui dun’é kontenido, tokante e prioridatnan ku lo pone i relashoná ku formulashon di un plan konkreto.”

Mirando ku Minister di Hustisia ta responsabel pa garantisá un nivel adekuá di protekshon di dato ora ta prosesá dato polisial, e mester palabrá eksplísitamente ku DWJZ pa Minister risibí informashon regularmente riba e progreso lográ den realisashon di e Lei di Reino pa protekshon di dato personal. E Minister mester (laga) averiguá te kon leu e kámara- i sobrá ekiponan kumprá ta usabel ainda. Tambe mester traha un presupuesto realístiko di e gastunan, tantu pa kaba e proyekto komo pa e vigilansia ku kámara por ta sostenibel, por ehèmpel, gastu struktural pa konekshon riba ret, i mantenshon i remplaso di ekipo na tempu. Den e ‘beleidsplan’ (plan di maneho) di fondo di kriminalidat yüli 2022 te yanüari 2023, Ministerio di Hustisia a reservá 1 mion florin pa e proyekto. “E pregunta ta si esaki ta sufisiente, mirando loke mester realisá ainda.”

Otro rekomendashon ta ku mester regla di antemano pa e fondonan ku tin mester pa kompletá e proyekto i hasié sostenibel por ta disponibel na tempu. I regla mihó almasenamentu i maneho di e produktonan kumprá. I pa por kompletá e proyekto di un forma rápido pa asina evitá, i sino limitá, destrukshon di kapital. Tambe mester presentá e plan di aserkamentu pa e trayekto legislativo na Parlamentu, i tambe e plan di aserkamentu pa e parti ku falta ainda den ehekushon di e proyekto di vigilansia ku kámara, indikando tambe e planifikashon di tempu i kon lo finansi’é.

“Informá Parlamentu periódikamente, por ehèmpel kada kuartal, tokante marcha di e trayekto legislativo, inkluso introdukshon di e Lei di Reino pa Protekshon di Dato Personal, i e progreso lográ relashoná ku e sobrá trabanan señalá. Kontrolaria su rekomendashon na Parlamentu ta pa tene Minister di Hustisia responsabel pa marcha di e proyekto. Por palabrá ku e Minister ku Parlamentu mester risibí e plannan di aserkamentu i ser informá regularmente tokante e resultadonan.”