Segun Concincion, na Kòrsou no tin sifranan konkreto ni pronóstikonan ainda, pero   spera un oumento den e kantidat di kasonan di malesanan sikogeriatriko na Kòrsou.

WILLEMSTAD – Defensor di Pueblo i representante di Raad van Ouderenbeleid dia 10 di novèmber a haña invitashon pa presentá 9’or di mainta dia 10 di novèmber próksimo, pa reuní den Komishon Sentral tokante kuido pa hende grandi sikogeriatiko, manera alzheimer. Presidente di Parlamento Charetti America-Francisca a stipulá e tempu pa papia riba e punto di agènda akí na un tanda di 10 minüt.

Ta Partido Nashonal di Pueblo ta e frakshon ku a manda un petishon por eskrito pa Presidente di Parlamento pa konvoká e reunion, pa kua Sheldry Osepa, Gwendell Mercelina, Elvin Gerard i Corrine Djaoen-Genaro a pidi Presidente pa invitá tantu Defensor di Pueblo Keursly Concincion komo un representante di Raad van Ouderenbeleid pa por duna Parlamento, pueblo di Kòrsou i grandinan mas informashon i trankilidat riba e tópiko akí. Frakshon di PNP a tuma nota di e preokupashon ku Defensor di Pueblo a trese dilanti relashoná ku e retonan ku hendenan grandi ku ta sufri di enfermedatnan sikogeriatiko (pa ehèmpel alzheimer) tin. Tur esaki a bolbe bira konosí despues di e rapòrt tokante maneho di grandinan.

Segun Defensor di Pueblo den un karta na Minister di Salubridat Javier Silvania resientemente, for di diferente kòmbersashonnan ku vários organisashon i institutonan gubernamental el a establesé ku un siudadano ku ta biba su so i ku mentalmente no ta den e estado pa sòru pa su mes, den práktika por haña yudansa di gobièrnu solamente si un miembro di famia òf un otro persona hasi su mes legalmente responsabel p’e. For di informashon risibí serka organisashonnan manera Fundashon Alzheimer, ta resultá ku pa 2025 e kantidat di persona ku ta sufri di demensia lo oumentá mundialmente.

Segun Concincion, na Kòrsou no tin sifranan konkreto ni pronóstikonan ainda, pero teniendo kuenta ku e echo ku embeyesimentu ta oumentá riba e isla, por bisa koutelosamente ku si e situashon no kambia, e chèns ta grandi ku por spera un oumento den e kantidat di kasonan di malesanan sikogeriatriko na Kòrsou. Raad voor Ouderenbeleid a duna un splikashon amplio tokante e desafionan i trabanan den kuido di grandi riba nos isla, den su rapòrt entregá na gobièrnu, titulá ‘Adviesrapport Wet- en Regelgeving Ouderenzorg’. Concincion ta teme ku e oumento di embeyesimentu lo sigui kondusí na empeoramentu dje situashon aktual, si no tuma medidanan preventivo na tempu.