WILLEMSTAD – Parlamento lo bini huntu djaweps awó for di 9’or di mainta, pa deliberá ku Minister di Tráfiko, Transporte i Planifikashon Urbano Charles Cooper i gerensia di Fundashon Kas Popular (FKP), tokante desaroyonan preokupante na FKP. Presidente di Parlamento Charetti America-Francisca a konvoká riba petishon di frakshon di PAR.

Kada Parlamentario ta haña 20 minüt pa papia durante e promé tanda i 10 minüt den e di dos tanda. E petishon p’e reunion a bai kuminsamentu di luna pasá pa e Presidente. “Ki dia mi ta tende di FKP? Ta kuantu kas sosial FKPC a logra konstruí? Mi no por keda kla ku FKP!” Esei a e preguntanan i preokupashonnan ku Ana Maria Pauletta di frakshon di PAR a bisa America-Francisca ku e ta risibí ku frekuensia. P’esei e tabata ke pa e Presidente yama e reunion, spesialmente basá riba ekspreshonnan di Minister di Planifikashon Urbano Cooper, Direktor finansiero di FKP Peter Bongers i direktor di FKP Arthur Con durante e reunion di dia 1 di sèptèmber aña pasá.

Ta basá riba e ekspreshonnan ku e trio a hasi, frakshon di PAR a hasi un petishon riba e mesun fecha pa un reunion públiko ku e tema ‘Deliberashon ku Fundashon Kas Popular’. Pauletta a manda un karta pa rekòrdá America-Francisca dia 17 di novèmber aña pasá i dia 1 di sèptèmber último a hasi nèt un aña ku a hasi e petishon pa e reunion publiko. “Miéntras nos ta pendiente di e reunion ku FKP, a bende e edifisionan den área di Rif sin ku Parlamento tin un bista riba e proseso di e destaho. E kuentanan anual di FKP ku aparentemente lo a finalisá na aña 2022, ainda no a yega Parlamento. Nos ta finalisando aña 2023, sin ku nos a mira niun di e kuentanan anual di FKP ku ta data for di aña 2013.”

Segun Pauletta, ta pekuliar ku durante di e reunion di komishon sentral aña pasá, Minister Cooper di forma chistoso a bisa ku lo mester konvoká e reunion públiko otro aña, esta 2023, i su palabranan ta resultá di ta bèrdat. “Den kuadro di konmemorashon di un aña di e petishon pa e reunion akí, mi ta dirigí mi mes na Presidente ku algun pregunta. Por informá kua ta e motibu pa kua ainda no a konvoká e reunion fechá 6 di sèptèmber 2022 ku tópiko ‘Deliberashon ku Fundashon Kas Popular’? Presidente tin un bista pa ki temporada lo konvoká e reunion akí i por informámi di esaki?” Asina el a puntra den su karta. Entretantu e Presidente a konvoká e reunion pues.