Dia 30 di aprel parlamento lo bai trata e lei nobo di LOK i tambe Algemene Landsverordening Landsbelastingen.

Willemstad, — Dia 30 di aprel parlamento lo bai reuní pa asina kubri e lei nobo LOK den sala di parlamento.

Dia 30 aprel parlamento di Kòrsou lo bai kubri dos reunion di kual unu lo ta bai ta tokante di LOK. E otro reunion lo ta bai ta tokante di Algemene Landsverordening Landsbelastingen. E lastu reunion riba LOK tabata den yanüari.  E lei aki ta un lei konsepto ku ta den desaroyo. Minister di Finansa Javier Silvania a enfatisá anteriormente ku modernisashon dje lei no ta un luho, pero un nesesidat. Pa e motibu ei el a presentá e proyekto di lei akí. E proposishon di lei nobo ta representá un reforma radikal na e struktura di e proseso di duna lisensia. Esaki ta enserá krea un outoridat nobo di wega di plaka (Curaçao Gaming Authority), ku lo duna lisensia direktamente na operadónan i perkurá pa kumplimentu.

Segun Silvania, e lei nobo ta regla ademas ku awó sí entrada di tarifanan di lisensia (license fee) i impuestonan pa wega di plaka lo bai direktamente den kaha di gobièrnu. E struktura akí lo remplasá e sistema aktual ku ta konsistí di 4 doño di lisensia prinsipal (MLH) aktivo ku ta duna sup-lisensia na mas ku 800 operadó. Te na e momentonan akí ta e doño di lisensia prinsipal tin e relashon komersial i finansiero direkto ku e operadónan. Segun Silvania, Kòrsou ta úniko den e tipo di diseño multi fasétiko akí. Niun otro huridikshon komparabel no ta konstruí di e forma akí, i e konsekuensianan ekonómiko di esaki ta inmenso. E Minister a splika ku kontrali na otro paisnan, na Kòrsou e benefaktor di e entradanan di e tarifanan anual di duna lisensia i e impuestonan pa wega di plaka ta bai kompletamente pa sektor privá.

Kasi nada di e entrada direkto di wega di plaka no ta bai pa gobièrnu. P’esei e kambio. Verda Betrian sikólogo manager di Fundashon pa Maneho di Adikshon (FMA) a kompartí ku adikshon di gambling no ta algu ku ta mira fásil i ku mal maneho di sèn ta un aspekto ku ta mira bèk na personanan ku ta adikto na gambling. Gruponan vulnerabel ta entre otro penshonadonan pero esaki no ta ekskluí personanan yòn tantu hende muhé i hende hòmber. Parlamentario Fergino Brownbill di frakshon MFK, a kompartí ku for di e ordenansa aki niun fondo no ta sali i bai bèk na e organisashon ku gobièrnu ta delatá trabou na dje pa e trabou di adikshon. Brownbill a splika anteriormente ku e ta spera ku den konsulta ku minister di Finansa ku ta yega na esaki.