WILLEMSTAD – Den un karta dirigí na Parlamento, e organisashon ku ta sali na interes di airu limpi tur kaminda, ta pidi e miembronan pa kambia e proyekto di lei ku ta kontené kambionan esensial relashoná ku e eksigensianan di kalidat di airu, yamá “Landsverordening luchtkwaliteitseisen Curaçao”. E organisashon ta enfatisá e nesesidat di un revishon dje konsepto promé ku aprobá esaki. Si no hasi esaki, e organisashon ta hañ’é obligá pa kana kaminda di Korte. Asina e representantenan dje fundashon, bufete di abogado Triple A Attorneys ta atvertí den e karta ku Parlamento a risibí resientemente.

E proyekto di lei ta stipulá sanshonnan fuerte pa violashon di e reglanan, manera detenshon òf butnan altu. Otro siman djaluna Parlamento lo bini huntu pa reuni tokante e proyekto di lei aki. Kada miembro ta haña 35 minüt di tempu pa hiba palabra. E meta final ta pa kambia e asina yamá “Hindervergunning Curaçao 1994”, e “Landsverordening voor de Volksgezondheid”, i e “Eilandsverordening leges, precariorechten en retributies Curaçao 1992”. I asina introdusí e lei nobo “Landsverordening luchtkwaliteitseisen Curaçao”.

E konsepto di lei ku tin komo meta establesé eksigensianan di kualidat di awa pa e isla, pero ku e fundashon ta konsiderá komo insufisiente i dañino pa salú di públiko i medio ambiente. Fundashon Clean Air Everywhere ta konosí komo un organisashon di interesnan ku ta traha pa solushoná, redusí i prevení problemanan medioambiental, ku atenshon spesífiko riba kalidat di airu den e área bou di bientu dje área industrial rondó di Schottegat. E organisashon a ekspresá nan preokupashon tokante e kontenido dje konsepto di lei, ku nan ta konsiderá di no ta kumpli ku e eksigensianan di artíkulo 8 di e Tratado Europeo di Derechonan Humano (EVRM) i ku no ta un alternativa adekuá pa e normanan dje organisashon mundial di salú, WHO.

Un dje opheshonnan Clean Air Everywhere ta e poko balornan di límite i direktivanan proponé, pa supstansianan kontaminante manera “zwaveldioxide” (SO2) i partíkulanan fini (“fijnstof”, PM). E konsepto di lei ta tuma poko konsiderashon ku e riesgonan pa salú di poblashon, spesialmente durante e periodo di transishon te 2035 kaminda Refineria di Kòrsou (Rdk) tin difikultat pa kumpli ku e normanan establesé. Ademas ta mantené e pèrmit di molèster (“hindervergunning) ekistente pa e refineria, ku lo mantené e emishon di supstansianan kontaminante na e área bou di bientu na Schottegat tambe.

Un otro punto krítiko dje fundashon ta konserní e falta di balornan di límite òf direktivanan pa “koolstofdioxide” (CO2), no opstante e promesanan inisial di gobièrnu. Segun e fundashon, esaki ta un defisiensia serio den bista dhe nesesidat urgente pa redusí e emishon di “broeikasgassen” i pa kombatí kambio di klima. Fundashon Clean Air Everywhere ta atvertí tokante e konsekuensianan di kambio di klima, manera temperaturanan mas altu, kresementu di nivel di laman i klima ekstremo, ku ta representá un menasa direkto pa Kòrsou. No opstante e seramentu dje refineria Isla, Kòrsou ta keda un dje mayor emisornan di CO2 den Latinoamérika i Karibe, ku por kousa desasternan medioambiental adishonal.

E fundashon ta enfatisá tambe ku no a tuma sufisiente konsiderashon ku e interesnan signifikante di siudadanonan pa ta protegé kontra kontaminashon di airu. E falta di transparensia i hustifikashon konkreto pa alehá di e normanan di WHO ta un punto di preokupashon. Meskos ta konta tambe pa e interesnan ekonómiko ku ta konsiderá kontra salú públiko.

Ademas Fundashon Clean Air Everywhere ta señalá e falta di posibilidat pa kontrolá kalidat di airu, pasó e página digital pa midi kalidat di airu www.luchtmetingencuracao.org no ta operashonal for di yüni 2023 mas. Esaki ta opstakulisá e maneho di reglanan medioambental i suprayá e urgensia di un revishon di e lei proponé. E fundashon ta hasi un yamada na e miembronan di Parlamento pa no aprobá e konsepto di lei akí den su forma aktual, pero pa hasi kambionan supstansial ku ta protegé salú públiko i medio ambiente efektivamente. Si apesar di esaki e miembronan di Parlamento disidí pa aprobá e konsepto di lei tòg, Fundashon Clean Air Everywhere a anunsiá ku lo tuma akshon legal pa diskutí e desishon.