Herbert Mensche, momento tabata drentando Fòrti riba 22 di mei 2022.

PUNDA—Minister di Kabinete Pisas II a keda despista kompletamente pa direktor di Refineria di Kòrsou Patrick Newton i lider di proyekto Arawak, Herbert Mensche (Head Hunting Team). E dos hòmbernan riba 22 di Mei 2022, a drenta Fòrti ku dokumentashon bou di nan brasa.

Tabata riba un djarason mainta, riba 22 di Mei 2022, na okashon pa entregá i presentá na Hunta di Minister un konseho riba e último tres kandidatonan pa manehá Refineria Isla. Pa 10.30 mainta, Mensche i Newton a baha nan outo i kana direkshon sala na Hunta di Minister. Den un deklarashon na Vigilante nan a konfirmá ku e trabounan ta kla i awor e desishon final ta den man di Hunta di Minister. A keda presentá komo kandidato e kompania di Socap, Socorro Capital di Raul Socorro, komo e kandidato ku a gana e destaho pa manehá Refineria Isla.

18 luna despues, Refineria Isla ta sin huma. Kiko a sosodé? Riba 22 di Mei 2022, durante e reunion ku Hunta di Minister, Mensche i Newton a kombensé kabinete Pik Pisas, ku grupo SOCAP ta kapasitá i na ta kla pa sigui ku e proseso di Heads of Agreement. Esaki a sosodé, kontra di konseho di Randolph Camelia, kende tabata miembro den Hunta di Komisario. Camelia tabata kombensé ku e grupo no tabatin e karga di kapital pa por finansiá e operashon riba tereno di Isla. Socap, despues ta traspasá e derechinan pa e kompania Caribbean Petroleum Refinery (Holding i BV).

A bin resultá, ku tantu Newton komo Mensche sea konsiente of inkonsiente, a despist’a kabinete Pisas. Caribbean Petroleum Refinery, no tabatin e fondonan nesesario ni pa ópera Refineria Isla ni hasta pa por a paga 1.2 mion dòler mensual pa manehá tankinan di Bullenbaai. Te ainda, durante tratamentu di por lo ménos 7 kaso sivil, a keda kombinsentemente pruebá ku CPR, tantu Holding komo BV no tabatin sèn pa manehá Refineria Isla.

E Tim di Head Hunting, den proyekto Arawak a despist’a un pais i su gobièrnu. No solamente, e grupo no tabatin sèn na Mei 2022 sino te ku ayera, 10 di Òktober 2023 e grupo ta sin sèn. Awor ku ta konosí ku e grupo CPR, no tabatin e rekisitonan nesesario pa yega na un remarke, e reklamonan di GIK ta bira interesante. Un karta bastante rogatorio ku dr. Rutsel Martha a manda, dirigí na tur miembro di Parlamento i Hunta di Minister, a mustra prekupashonnan di GIK. GIK ta uni dje último tres konsorsionan ku tabata den kontienda pa manehá Refineria Isla. E kompania representá pa dr. Rutsel Martha a mustra den e karta alegando ku ta nan ta turno òf aló ménos meresé un oudiensia. E karta a bini despues ku e nòmber di Global Oil a bini dilanti. Aparte di ta supliká pa oudiensia, GIK a lansa menasanan leve den direkshon ku gobièrnu a kometé infrakshonnan  kontra di leinan sivil. Pa kasualidat e karta a sali apénas 1 siman despues ku Global Oil, a mustra interes pa produsí asfalt riba tereno di Isla.

Miembro di kabinete Pisas, Charles Cooper a sali na defensa di CPR, alegando ku GIK a pèrdè “fair and square”, esta un viktoria limpi. Cooper a lansa atake tambe riba GIK akusando e grupo i Martha ku durante di e proseso GIK a purba lobby di tur manera serka nan i serka algun miembro di hunta di komisario di RdK. Cooper a bisa di a keda leu. Pasobra segun Cooper, nan ta separá amistat for di interes general di pais. Cooper a menshoná, reunionnan tené den un Restorant den área di Dominguito i tambe na kas di un prominente eks polítiko den parti pariba di Kòrsou, ku entre otro algun èks miembro di hunta di komisario di RdK. Segun Cooper, dia ministerio públiko manda yam’e e ta bai den mas detaye di esaki. Si ta nesesario. Hecho ta, segun Cooper ku gabinete Pisas a tene nan mes masha leu for di e proseso di buska un operador pa refineria. P’esei riba proposishon di RdK a bai di akuerdo pa lanta un Headhunting Team pa guia un proseso limpi i transparente. Segun Cooper, RvM i RdK, a bai di akuerdo ku lo respetá e lokual ku Headhunting Team bini kuné komo resultado for di nan análisis, ken lo ta e bidder preferí pa sigui negoshá kuné. Finalmente segun Cooper, Sr. Martha mester komprondé den un proseso limpi di buska operador nobo pa Refineria Isla, nan a pèrdè.

Ta kuestionando awor tantu pafó komo paden di korte, “kon limpi” e proseso por tabata si tur prueba ta indiká ku grupo CPR tabata un grupo bashí presentá pa gana un destaho i despues buska un sosio finansiero. Un kos ta sigur, tantu Head Hunting Team komo maneho di Refineria di Kòrsou, a surpasá tur límitenan di Kumplimentu Responsabel pa presentá CPR komo kandidato.

.