Helmin Wiels Boulevard unda e aksidente lamentabel a tuma lugá.
Willemstad—- Ayera den oranan di mardugá Kòrsou a registrá otro morto den tráfiko na momento ku un vehíkulo mester a aksidentá kontra dos palunan di palma pa na final e shofùr bin pèrdè su bida debí na e aksidente aki.
Djamars 23 di mei 2023 alrededor di 01.55’or, Sentral di polis a risibí yamada di un aksidente di tráfiko serio ku a tuma lugá riba Helmin Magno Wiels Boulevard. Na yegada di e promé unidat el a bin topa un outo di famia den kua tabatin un hòmber ku tabata gravemente heridá. Investigashon preliminar na e sitio ta indiká ku shofùr di e outo aki tabata kore riba e kaminda menshoná den direkshon di Parasasa. Den un bògt ku ta dobla na man drechi, pa motibunan te ainda deskonosí, e shofùr a pèrdè kontròl riba su vehíkulo i bai dal kontra di un palma riba e asera ku ta separá e kaya aki den dos direkshon. Despues di a dal den e promé palma i kibra esaki kompletu, e vehíkulo a bai dal den un siguiente palma i para. Personal di ambulans ku a yega na e sitio no por a hasi nada mas pa e víktima i dòkter di polis a konstatá morto. Personal di Departamento di Tráfiko ta kontinuá ku e investigashon. Debí ku ainda identifikashon no a tuma lugá dor di famia, no por duna nòmber di e víktima liber. Di parti di Vigilante nos ta ekstendé palabranan di kondolensia na famia di e defuntu ku pèrdida di nan ser kerí.