Otrobanda– E pintor Ron Rijks ta organisá su promé solo-eksposishon djasabra 26 di ougùstùs. E eksposishon  ta titulá ‘Otrobanda by Ron Rijks’.

Ron Rijks tin un karera impreshonante i eksitoso tras di lomba komo artista di tatoo na Hulanda. Na aña 2017 Ron a bende su práktika i a bin biba na Kòrsou. Ron a traha su promé pintura ku 12 aña. E tin un gran pashon pa pinta i en partikular pa pinta kuadronan di akuarèl. ‘pintamentu di akuarèl ta manera tatuashon, bo no por korigí lokual ku bo ta traha, e mester ta bon mesora. Esaki ta hasié interesante, bo mester ta skèrpi.  E eksposishon ta kontené 25 kuadro akuarèl den kual Ron a kaptá su sintí pa ku dushi Kòrsou. ‘Asina mi ta mira Kòrsou, un harmonia perfekto den lokual otronan por ta lo yama desórden. Een muraya skeins, un porta di kurá ku no ta perfekto…ami ta mira komposishonan bunita tur kaminda.

Mi por ta mi mes riba e isla aki, mi ta biba felis!’ Ron Rijks ta gusta pinta espektákulonan di tur dia di Otrobanda i e barionan serka di Steenrijk kaminda e ta biba. Por bin disfrutá di su kuadronan di entre otro Netto Bar, warda di bus di Otrobanda, kayanan den Otrobanda pero tambe hende ta para sentral, manera un señora ku ta bende brièchi. ‘E señora ta un opheto di arte riba su mes; e manera ku e ta warda riba su klientenan ku pasenshi i e manera nèchi ku e ta bistí…’ Ron Rijks ta ansioso pa e eksposishon. ‘Ora bo ta tatuá, bo ta tatuá lokual bo kliente ta deseá, bo ta traha un arte di esei. I ora e ta kla, e arte ta kana bai lagabu. E kuadronan aki, mi mes a skohe nan. Mi ta spera ku esunan ku ta interesá den nan, lo bin tira un bista, mi ta ansioso pa risibí nan reakshon. E ‘pop-up’ eksposishon  ta tuma lugá diasabra 26 di ougùstùs di 10.00-16.00 or na Havenstraat 13-15 Otrobanda, den e edifiso pega ku Bario hotel ku e mural di delftblauw. E eksposishon ta aksesibel tambe durante Kaya Kaya Festival.