Vehíkulo ku a keda usá pa transportá e víktima na CMC.

Nieuwe Haven,– Prokurador General mr Bos a splika den su rekesitorio ku mirando e ruta ku a kore entre e trabou di Dishane Nelson pa Bonam, kaminda e maltrato a tuma lugá, no ta un ruta lógiko.

Usando data di telefòn, Ministerio Públiko a trèk e konklushon ku e akusado, Dishane Nelson, no a usa e ruta mas rápido pa yega na Bonam. Segun informashon, Nelson tabata traha na WTC i dado momentu e hóben lo a usa un taksi pa move den direkshon di Bonam. Segun prokurador general, e ruta ku Dishane Nelson a kore pa yega Bonam ta un ruta kaminda por dedusí ku e akusado lo a buska un arma di kandela promé ku a yega na e adrès. Antena telefóniko di Blue Bay a señalá Nelson den e área, kual ta den e mesun área ku Nelson ta biba.

Ministerio Públiko no ta kere e deklarashon di Nelson tokante e arma di kandela. Segun Nelson, e arma a kai for di Douglas durante un forsageo. Pero OM a indiká ku e deklarashon nan di e mama di Dishane Nelson ta splika algu otro. Pues no por kere den e deklarashon aki segun PG Bos.  Abogado Blonk kende a hiba defensa pa Dishane Nelson a indiká ku e ruta ku Ministerio Públiko a stipulá ta un konklushon robes. Segun e abogado e ruta mas rápido ta 17 minüt i e ruta ku Nelson lo a kore ta un ruta ménos lihé, pero no ta ruta ku ta dura mas largu.

Alabes e abogado a indiká ku ta imposibel ku su kliente lo a yega te na su kas pa kue un arma. Habri e kas, kue un arma, sera e kas bèk i den 1 minüt a move di De Savaan pa Buena Vista ta imposibel. Pues e konklushon di ruta di OM ta kompetamente robes, segun e splikashon di abogado Blonk.   Ministerio Públiko, representá dor di Prokurador General mr Bos, a indiká ku e ta duna un demanda di 15 aña di kastigu, mirando ku tin sufisiente indikashon Nelson lo a plania e asesinato.

Korte a indiká ku nan mester di mas tempu pa evaluá e kaso, pues nan lo duna nan veredikto despues. Den e puntonan di orientashon di korte, asesinato premeditá ta wòrdu kastigá muchu mas pisá ku un asesinato no planiá. Kastigunan pa asesinato por varia entre 10 pa 18 aña, pero mirando ku e akusado a keda kondená na un kastigu di 10 aña, por nota ku korte no a duna un kondena adishonal.