Vilchez: SAP tabata e promé sindikato pa kuestioná COHO.

Nieuwe Haven–  Na Sèptèmber 2022, presidente di e sindikato SAP, tabata sintá su so na mesa den edifisio di SSK. Einan e la informá Kòrsou ku COHO ta bai kai den otro. Ku e presentashon ei, SAP a demostrá di tabata mas altante di e desaroyonan kompará ku e sindikato ABVO, ku a entrega e bataya.

E sindikato Ámtenarnan di Polis i Kadena Hudisial, SAP, mediante nan presidente Amado Vilchez na Sèptèmber último,  a demandá  gobièrnu di Kòrsou hasi un revishon di COHO. Esaki nan a súplika despues di a logra risibi un karta unda sekretario di estado Alexandra van Huffelen ta konfirmá ku e islanan di Antias tin un derechi di Outo Determinashon.  E sindikato  a tene un rueda di prensa den sala Julia na edifisio di SSK ku bista riba Nieuwe Haven. SAP a enfatisá riba un karta ku Van Huffelen a kontesta preguntanan di e fundashon na St. Maarten Pro Souliga, kual fundashon pa algun aña ta bringando Outo Determinashon i proseso di independensha pa St. Maarten.

Segun SAP e karta di van Huffelen den un kontesta na Souliga ta un dokumento di maneho unda nan por eksihí pa gobièrnu di Kòrsou revisá COHO. “Nunka no ta lat” Vilchez a duna di konosé  durante rueda di prensa. Segun SAP for di e karta nan a dedusí ku van Huffelen mes ta atmití lokual tin den un eskrito di Reino riba 27 di febrüari 2018. Esaki ta den paragraf 2.2 di e eskrito. “Desishon riba maneho polítiko, ekonómiko sosial i kultural ta wòrdu tumá dor di pueblo mes òf su representantenan legal, no dor di otro i ku tal desishon ta wòrdu tumá den pleno libertat sin niun preshon òf metementu di afó”. SAP ta opiná ku Hulanda no por uza un situashon di emergensha i nesesidat pa por ehèmpel imponé un Lei di Konsenso manera COHO. Esaki ta kontra di e proseso di Outo Determinashon i ta pa tal motibu, SAP kier pa Gobièrnu di Kòrsou, mediante nan demanda revisá COHO.

E ponensha di SAP a bin resultá di tabata bèrdat. COHO ta for di mesa i awor mester wak si tòg gobièrnu tei sigui ku e parti den Pakete di Pais pa e rekorte di 12.5% riba salarionan.