Amado Vilchez, SAP.

Rio Canario— Tres sindikato, SAP, STrAF i ABVO ta wardando riba minister di hustisia, Shalton Hato for di 20 di aprel pa un enkuentro. Esaki ta lokual presidente di SAP, Amado Vilchez a duna di konosé ayera na Vigilante.

Segun Vilchez, for di 13 di aprel e minister a primintí di bini mesa den un siman pa splika su maneho na Sindikatonan i representantenan den Kuerpo di Polis. Esei ta nifiká ku e sindikatonan ta wardando for di 20 aprel riba e presentashon di minister sin ningun suerte. Tin diferente problema pa atendé den kuerpo segun e sindikatonan i minister mester trese su maneho. Entre otro  problema di embeyesimentu i falta di sufisiente personal ta formando un problema bastante serio ku ta reflehando tambe den preparashon adekuá di kasonan ku mester yega korte di hustisia.

Sindikatonan, STrAF, ABVO, NAPB i SAP, ámbos mediante  nan lidernan a apuntá e problema. E skarsedat di personal a afektá e nivel di produkshon di organisashonnan hudisial enormemente i a hasi ku e personal eksistente kasi no por sostené e preshon ku tin riba nan. Konstantemente ta hasi esfuersonan denter di e kadena pa enfrentá e skarsedat di personal ku medidanan inovadó i kreativo. Mas aleu tambe tin e problema di e situashon hurídiko di e staf di LBD, ku tampoko no a tende nada. Pa lokual ta trata e LBD nan, tabatin un deadline stipulá pa medio Yüni pa minister presentá un aklarashon. No  tende nada mas. Prinsipalmente STrAF i Juan Lourens ta atendiendo e problema ku minister sin ta biniendo kla pa por informá su miembronan. Minister a laga sa di tende algu pa Yüni, pero entretantu a drenta Ougùstùs i no tin nada formal. Durante un tratamentu sivil, abogado di gobièrnu Chester Peterson a shòk polisnan den sala alegando ku ta bai eliminá LBD. Peterson a bisa esaki den korte den representashon di un kaso entamá kontra di gobièrnu pa un miembro di LBD. A surgi bastante problema riba lokual e abogado a duna di konosé. I minister a sali splika ku no ta eksaktamente manera e abogado a deklará den korte.

Konhuntamente riba 5 di mei último, sindikatonan a manda un karta mas pa Minister Hato pa apuntá su falta di inkumplimentu. Segun Vilchez, di parti di SAP nan ta inventarisando tur lokual ta bayendo robes den Kuerpo i kualnan ta kai bou di maneho di Hato. Te ainda, segun Vilchez nan di SAP tei duna e minister benefisio di duda. Pero e problemanan di kapasidat ta reflehando tantu riba kaya dunando asistensha pero tambe den korte, unda kasonan no bon prepará ta yega pa tratamentu. Kuerpo ta tratando na oumentá nan personal pero esei no ta sufisiente.  “E intenshon di e kuerpo polisial pa kuminsá forma 30 agente nobo den 2023 no ta yena e buraku. Un otro problema ta e forsa laboral di Landsrecherche Curaçao (LrC) ta leu di ta sufisiente. Pero den 2022 e kapasidat a deteriorá mas tantu ainda. E falta di kapasidat di personal tabata e drèmpel di mas altu den kadena hudisial. E defisiensia a bira mas agudo den 2022, debí na e gran kantidat di funshonarionan ku a hasi uso di e posibilidat pa baha mas tempran ku penshun.