WILLEMSTAD, — Minister di Justisia Shalten Hato, a bolbe manda un petishon rekordatorio pa Presidente di Parlamento Charetti America-Francisca, pa konvoká un reunion públiko pa trata e proyekto di lei pa kambia nos kódigo di Prosedura Penal (Wetboek van Strafvordering, Sv) mas pronto ku ta posibel.

Den su karta, e Minister ta lamentá ku ainda e no a risibí niun reakshon dje Presidente riba su karta di 11 di mei último. Tambe e ta suprayá ku e Sv nobo lo drenta na vigor na Aruba dia 1 di yanüari 2024, i si no tuma medida, por resultá ku e leinanan di e paisnan no ta den konkordansia mas.

E Minister ta referí tambe den su karta na e reunion ku a tuma lugá dia 15 di febrüari último pa analisá e kambionan proponé i ta indiká ku teniendo kuenta ku e disposishonnan di Statüt, mester kordiná e tratamentu di e leinanan na Aruba, Sint Maarten i Kòrsou. E ta menshoná ku loke ta importante sa ta ku e Kodigo di Prosedura Penal nobo lo drenta na vigor na Aruba riba 1 di yanüari 2024, i ta insistí riba su petishon pa pone e proyekto di lei nobo riba agènda di un reunion públiko i trat’é mas pronto posibel. E ta spesifiká ku e introdukshon dje Kódigo di Prosedura Penal nobo na Aruba, por okashoná un situashon kaminda e leinan di e paisnan no ta den konkordansia mas, i esaki por tin konsekuensianan negativo pa prák­tika hudisial.

Presidente di Korte Komun Mauritsz de Kort tambe a hasi un apelashon urgente na Minister di Hustisia di Kòrsou i Sint Maarten riba 11 di aprel di aña pasá pa urgi nan bai nan respektivo Parlamento i sòru pa pone e proyekto di Kódiko di Prosedura Penal riba agènda pa tratamentu, pa despues Parlamento tuma un desishon tokante esaki. E komishon di revishon komun ku ta bai bou di guia di hues Hans de Doelder a representá tur e paisnan, Aruba, Kòrsou i Sint Maarten, i tambe tur gremio relevante.

Segun Presidente De Kort, e meta di e komishon tabata pa prepará un Kódigo di Prosedura Penal ku ta unifiká pa tur tres pais, i ku ta den konkordansia. De Kort a insistí den su karta ku, ya ku e proyekto di Kódigo di Prosedura Penal ta kla un tempu kaba i ya ta aprobá tambe pa Parlamento di Aruba, ta importante pa Parlamentonan di Kòrsou i Sint Maarten tambe ta trat’é i aprob’é. Si e leinan no drenta na vigor na mes momento, e konsekuensia ta ku e paisnan i nan respektivo instansianan di investigashon, lo traha ku leinan diferente den Reino. Esaki kousa situashonnan indeseabel i inefisiente den sistema hudisial.

Hof komo e organisashon enkargá ku ehekushon dje sistema hudisial lo haña su mes konfrontá ku regímen di prosedura penal diferente ku e mesun kuerpo di huesnan i tambe e instansia mas altu, esta Korte Supremo mester evaluá. A manda un kopia di e petishon akí pa e gobernadonan di e dos paisnan, prokuradó-general, Minister di Hustisia di Hulanda i sekretariado di JVO (esta Justitieel Vierpartijen Overleg, ku ta e enkuentro hudisial dje kuater paisnan den Reino hulandes). Parlamento a risibí e konsepto di lei pa aprobashon for di dia 29 di ougùstus 2019. Komishon Sentral a saka un rapòrt preliminar dia 4 di mei 2020, despues a saka un Nota di kontesta dia 25 di febrüari 2021. Minister Hato a manda tantu e karta Presidente di Korte De Kort, e rapòrt preliminar i tambe e Nota di Kontesta pa Parlamento na aprel. Despues Parlamento a risibí un presentashon tékniko tambe dia 15 di febrüari último. Segun Minister Hato, Parlamento mester hasi lihé awó i trata i aprobá e konsepto di lei pa yega na un Kódigo di Prosedura Penal nobo.