AMSTERDAM—Schiphol a haña permit pa 13.000 vuelo èkstra den periodo di zomer 2024, asina e airport a anunsia.

Den henter 2024 tin espasio pa 483.000 vuelo segun Schiphol. Legalmente tin espasio pa 500.000 vuelo awor ku gabinete a revoke un limitashon pa 2024. Pero despues di kombersashonnan ku entre otro departamentu di trafiko aereo i duana, Schiphol a tuma desishon ku e kantidat no ta realistiko. E kantidat di vuelonan total ta depende di e kapasidat di entre otro Marechaussee, duana i trafiko aereo. Den 2022 tabatin hopi kaos na Schiphol, prinsipalmente pa falta di personal. Schiphol kier evita e situashon aki. Gabinete demishonario a disidi prome ku pa motibu di molester di zonido, permiti un maksimo di 460.000 vuelo na Schiphol pa 2024, pero luna pasa a revoka e plan despues di preshon di Union Oropeo i Merka. Pa e motibu aki pa 2024 un maksimo di 500.000 vuelo ta legalmente permiti. Pasobra a kambia plan, Schiphol mester a determiná di nobo pa kuantu vuelo tin espasio. Gabinete demishonario ta sigui traha riba limitashon pa airport, e plan lo keda evalua pa Komishon Oropeo. E kordinadó mester reparti e kantidat di vuelonan bou di e kompanianan di aviashon. Segun Schiphol mester wak den e repartishon kon ta struktrua e vuelonan pa evita flinanan na airport. KLM ta kontentu ku e ampliashon di kantidat di vuelonan pero ta enfatisá ku e kompania tin menos tempu pa prepara. KLM lo hasi tur esfuerso pa ehekutá e kantidat di vuelonan permiti. Por sierto ku den 2023 no tabatin 500.000 vuelo ku a Sali/aterisá na Schiphol. Schiphol ta kalkulá ku lo sera aña 2023 ku un total di 433.000 vuelo.