Willemstad—-Den transferensia di e montante di subsidie dia 26 di Januari di e aña aki ta pará klaramente ‘subsidie 1ste Kw Ang 6841,67’. Esei kiermen ku pa luna e subsidie ta Ang 2280,56. Nos a yama debidamente GMN mesora pa nos lo por a puntra ku si e subsidie a baha pa e aña aki. Nos a pidi pa komuniká ku nos dossierhouder kaminda nan a duna nos 2 number pa nos por a yama.

Un di e numbernan ta for di servisio I e otro no tabata responde. Ta di komprendé ku ora nos mira por eskrito riba e transferensia ku ta e monto ey so SDBC ta haña i kaminda nos a trata debidamente di haña klarifikashon di GMN sin logra, ku nos tin di aktua purá, pasobra esaki ta nifiká fin di SDBC. P’esei a organisá un konferensha di prensa NO PA GAÑA si no pa bisa kiko e transferensia eksplisitamente a komuniká. Direktiva ta lamenta ku GMN ta trese nos preokupashon dilanti di un forma negativo. Tambe di akusá nos di NO ta entregá dokumentonan na tempu. Mientras ta kada bes ta bini otro eksigensia riba mesa pa presentá otro dokumento mas. Direktiva ta hasi e trabou aki den tempu liber sin ningun pago. Ta un trabou kompletamente boluntario basá riba amor pa animal. Si SDBC haña un subsidie formal ku por paga tambe un direktor pa manehá e parti administrativo riba un base di 8 ora pa dia, tur dokumento por ser agensha muchu mas lihé. Ta bon pa bisa tambe ku tur donashon segun nos statuutnan tin di bai eksplisitamente pa gastunan di asiel i miembronan di direktiva no por haña ningun sorto di rekompensa ni hasta benzinegeld vergoeding. Mientras tur hende sa ku gobiernu su kosnan mes ta kana ‘pia riba breuw’ mientras nan si tin sufisiente hendenan bon pagá pa hasi e trabou. Ta lamentabel ku si ke akusá algun boluntario di buena fe. En todo kaso ku tur esaki a sali danki dios na kla ku nos subsidie a subi I ku pronto nos lo haña tambe Ang 300.000 pa ehekutá lei di bienestar ku ta pendiente un aña kaba.