Boluntarionan di STCC huntu ku famia royal kaminda famia royal a eksperenshá e trabounan di konservashon di turtuga.

WILLEMSTAD,– Kaminda na komienso di aña e organisashon enkargá ku konservashon di e poblashon lokal di turtuga, Sea Turtle Conservation Curaçao(STCC), a instalá un bestür nobo, e organisashon a sera aña ku entre otro, un training amplio ku otro partner tokante kon pa kapturá un turtuga.

Den 2023 e organisashon STCC tabata tin nan man nan yen ku trabounan pa konservá e poblashon aktual di turtuga. Den promé kuartal e famia royal a bin bishitá Kòrsou, kaminda STCC a risibí e oportunidat pa demonstrá e famia royal e diferente trabounan ku ta esensial pa reskatá, rehabilitá i investigá e poblashon lokal di turtuganan. “Ta asina ku na Cas Abou prinsesa Amalia a risibí e oportunidat pa hiba un turtuga laman Ard Vreugdenhil di STCC a splika na Vigilante. “Nos por a demonstrá (na e famia royal) tur trabounan ku nos boluntarionan ta hasi diario na laman. E trabounan ta inkluí, koba un nèshi di turtuga, a analisá un nèshi aktual i lokalisá un nèshi nobo di turtuga”. Segun Vreugdenhil, e dia ku e famia royal a finalisá riba un forma bunita na momentu ku e boluntarionan di STCC a risibí oportunidat pa kòmbersá ku e famia. Tabata tin kòmbersashon nan basta íntimo tokante e diferente trabounan di STCC, e importansia di e trabounan i e diferente retonan ku STCC sa lucha kun’é.

Banda di diferente reskate di turtuganan ku a tuma lugá e aña aki, Vreugdenhil a sigui splika ku den fin di aña aki STCC a tene un training ku diferente otro partner pa siña kon pa kapturá un turtuga. Organisashon nan ku a risibí training tabata fundashon “Uniek Curaçao”, CITRO, Warda Kosta i Carmabi. E énfasis di e entrenamentu tabata pa drecha e kordinashon entre e gruponan durante un reskate di turtuga. Tambe Veugdenhil a splika ku e entrenamentu ta un preparashon tambe di e yegada di Sargasum.

Por último Vreugdenhil a para ketu riba e tema di kordinashon. Segun Vreugdenhil, no solamente kordinashon den nan organisashon, pero tambe kordinashon huntu ku e otro partnernan eksterno. E kordinashon ta importante, por sierto, mirando ku STCC ta fungi komo un dje konseheronan pa determiná e plan nan di futuro di Klein Curaçao. Apesar ku e parti di turismo ta interesante pa komersio riba Klein Curaçao, Vreugdenhil a indiká ku e naturalesa di Klein Curaçao ta keda un naturalesa vulnerabel.