Segun PIN gobièrnu Pisas a roga Hulanda pa baha plan fo’i website
August 3, 2023 • 3 minüt pa lesa
Camelia Römer: Gobièrnu di Pisas a skonde informashon.
Punda– Partido PIN a nota ku den un pániko, sitando un kantidat di reglamento, Gobièrnu di Kòrsou, a pidi Hulanda pa baha Kòrsou su plan pa reformá servisio di impuesto for dje website di TWO. Ta trata di e organisashon Hulandes enkargá ku reforma den kuadro dje Areglo Mutuo (Onderlinge Regeling) ku a remplasá COHO.
PIN ta puntra: kon por ta ku gobièrnu Pisas a manda un plan di reforma di nos servisio di impuesto pa Hulanda sin ku ningun pushi na Kòrsou sa di dje, hustamente den e siman ku IMF a bisa ku pa Kòrsou bai dilanti mester enbolbí tur gremio i pone nanishinan den mes direkshon? Ta parse ku sr. Pisas a firma Onderlinge Regeling, grita ‘Biba Kòrsou’ durante konferensia di prensa na Hulanda, pero defakto ta aktua manera bou di komando di COHO.
Segun PIN, e protesta fuerte kontra COHO ta pa Kòrsou por diskutí, disidí i proponé su propio solushonnan. Esei ta enserá ku promé ku kualke kontenido di reforma yega na mesa di diskushon ku Hulanda, nos mester a diskutié aki na Kòrsou promé. Ku e maniobra aki gobièrnu Pisas mes a traishoná e intenshon tras di remplasá COHO ku e Areglo Mutuo ku e la mustra asina orguyoso di dje, segun PIN.
Tambe ta remarkabel ku ta sra. minister Larmonie-Cicilia a firma e karta pa urgi Hulanda baha e plan for di su website. E ta remarkabel pasó, komo lider di PNP, e mester por sa ku un parlamentario di su partido, meskos ku PIN tin hopi tempu kaba ta bisa, resientemente tambe a insistí pa involukrá parlamento muchu mas den e proseso di reforma. E pregunta ta: si sra. Larmonie-Cicilia sa esei, ta kon bin e la permití ku e plan a yega Hulanda mes promé ku a diskuti’e mas amplio aki nan promé? Òf Meskos ku MFK, PNP tambe ta haña ku parlamento no mester mete muchu ku e reformanan?
Aksentuando e nesesidat pa pone nanishinan den mes direkshon i respetá ku nos ta un demokrasia parlamentario, gobièrnu Pisas mester splika lihé dikon kosnan a bai asina ku e plan pa reformá servisio di impuesto. Pa komunidat Partido PIN ta pidi kontesta riba e siguiente preguntanan: dikon gobièrnu Pisas ta hasi misterioso rondó di su plan pa reformá servisio di impuesto? ta for di ki dia tin e plan di reforma pa servisio di impuesto i ku ken tur a diskuti’e? un kopia di e plan a bai pa parlamento, i si ta asina, for di ki dia? Si no ta asina, ta ki dia sí ta bai diskuti’e ku parlamento? gobièrnu lo sigui manda su plannan detayá pa Hulanda promé ku diskutí nan lokalmente? mirando ku na nòmber di minister di finansa, ta sra. Larmonie-Cicilia a firma e karta di petishon na TWO, gobièrnu por a informá komunidat for di ki dia minister Charles Cooper no ta remplasá minister Silvania mas i pa ki motibu a hasi e kambio?
Partido PIN ta spera gobièrnu Pisas duna komunidat direkshon kontestando e preguntanan ei.
| Camelia-Römer a yega displika ku ta posibel pa yega na un palabrashon ku Hulanda pa paga e montante ku a fia bèk. Ku COHO òf sin COHO e debe mester wòrdu pagá i esaki por wòrdu manehá tambe ku COHO òf sin COHO. E desishon final ta unu polítiko. Echo ta ku mester yega na un palabrashon. Si Hulanda no ke esaki por trese e opshon kaminda ta sigui papia di reforma ku intervenshon di International Monetary Fund (IMF) i Wereldband. IMF pa asina por tin un bista riba e parti finansiero ekonómiko i Wereldbank komo ku nan tarea primordial ta kombatimentu di pobresa. Di e forma aki por traha un pakete a base di palabrashon. Otro opshon ku Camelia-Römer a presentá ta pa laga CFT bini ku un ‘financiele aanwijzing’ pa asina pueblo por sa ku ta Hulanda a trese esaki i asina nan no por para tras di un akuerdo mutuo hinká den un lei. Di e manera aki Hulanda ta bini ku un instrukshon. Un otro kaminda pa kana ta pa bini ku un instrukshon pa sòru pa garantisá bon gobernashon i derechonan humano. |
