Suzy ta splika ku e asuntu di florin karibense ta den areglo mutuo for di 2010 i pues no ta kos di awor.

Willemstad,– Suzy Camelia Romer ta rekomendá den introdukshon di moneda nobo pa laga tur dos moneda, pues dòler i florin karibense keda na vigor, meskos ku ta pasando aktualmente na Panamá.

E ta bisa ku loke ta interogativo ta ku segun e no tin otro opshon i lòs for di tur diskushon e ora ei nos por bai disidí despues si ta dolarisá òf nos ta keda ku e florin karibense.

Señora Camelia Romer ta bisa ku na Kòrsou tur kaminda por paga ku dòler i ku nos florin ta mara na dòler, pues nos florin no ta kambia.

Na su opinion na e momentu aki pues ta bon pa sigui ku e florin karibense i hasi análisis pa wak kiko ta bentaha i desbentaha. Suzy ta kere ku e moneda di bo mes ta bon pa bo tin’e pa bo por manehá bo presupuesto.

E ta bisa tambe ku si balor di dòler ta ser disidí pa Merka bo kosnan riba presupuesto ta  subi i baha dependiendo di e balor di dòler na mundu, pero si e ta na bo mes moneda e balor ta keda manera ku e ta mara na e dòler.

E lider di partido PIN ta bisa ku pa laga e oportunidat di tin ámbos moneda bai, lo no ta sabi. “Ta bon pa wak kon nan ta hasiendo na Panamá”, asina Suzy a duna di konosé.

E ta pidi pa atendé e kos aki hopi mas serio, meskos ku a atendé e asuntu di glas skur den parlamento.

Suzy ta splika ku e asuntu di florin karibense ta den areglo mutuo for di 2010 i pues no ta kos di awor. “Tabatin diferente momentu di diskushon i awor ku mester kambi’é, ta bini ku un issue ku mester dolarisá òf no” asina Suzy ta bisa. E ta bis ku por diskutí, pero no por stroba e florin karibense di pasa. P’esei e ta pidi pa nos funshoná ku nos florin karibense i tambe dòler. E ta splika ku nos ta akseptá dòler tur kaminda i hasta na Sint Maarten  ekonomia ta dolarisá.

Segun Suzy e diskushon por ta sano i e por ta bon, pero e no mag di stroba introdukshon di e florin karibense. “Nos ta 13 aña mas leu for di 2010 i e sènnan a bira bieu”, asina Suzy a tèrminá bisando.