Willemstad,– Dia Internashonal di Kooperativanan di Spar i Krédito ta wòrdu selebrá for di aña 1948 riba e di tres djaweps di luna di òktober. Meta final di e selebrashon ta pa konsientisá komunidat di e tremendo trabou ku Kooperativanan di Spar i krédito (Credit Union), tantu mundial komo lokal, ta hasi. E dia di selebrashon tambe ta pa reflekshoná riba i promové historia i logronan di e moveshon di spar i krédito i duna rekonosementu na e trabounan duru i meritorio ehersé dor di su miembresia.

Djaweps 19 di òktober 2023 Credit Union nan di Kòrsou huntu ku tur otro Kooperativa di Spar i Krédito ta selebrá e di 75 aniversario di Dia Internashonal di Credit Union. Fekoskan (Federashon di Kooperativanan di Spar i Krédito di Kòrsou) ke hasi uso di e oportunidat aki di manda un kaloroso pabien na tur Credit Union di Kòrsou i nan sosionan. Fekoskan ta enkurashá nan pa sigui ku e bon trabou di duna sosionan i komunidat e oportunidat di embolbí nan mes mas tantu posibel den e mundu di Kooperativanan di Spar i Krédito i su ideanan.