E tim ku tabata tras dje limpiesa bou di viadukto. Mester indiká ku e empleadonan a traha boluntario riba e dia di limpiesa.

Viadukto,– Bou di e viadukto ku ta krusa riba Otrobanda por nota ku den wikènt tras di lomba tabata tin un limpiesa serio tumando lugá.

Prinsipalmente riba djadumingu empleadonan di Selikor a tene un limpiesa amplio den e área. Ta trata di e área bou di e viadukto ku ta krusa riba Otrobanda bai kue e stashon di konvoi di Otrobanda. Segun informashon disponibel, tantu departamentunan di Selikor Punda komo Selikor Otrobanda a sera kabes pa asina limpia e área. Tambe Vigilante a risibí e informashon ku riba dia di e limpiesa e empleadonan tabata traha riba un forma boluntario, esta nan no tabata traha den servisio di Selikor na e momentu dje limpiesa.

Ta un persona ku ta traha den e sektor turístiko a tene Vigilante na altura di e situashon kaminda tabata tin e limpiesa total den e área. Segun e persona, turista ta reklamá ku basta regularidat e situashon a-higiéniko bou di viadukto, pues esaki lo tabata un dje rason nan dikon e tim di Selikor a opta pa limpia riba nan dia liber.

No tabata solamente un limpiesa di shushi, pero tambe diferente área ku tabata tin e mal holó di urina a keda limpiá ku awa, habon i desinfektante. Riba djadumingu un trùk di awa a yega na e sitio i kuminsá basha awa den diferente huki ku mal holó. 

Foto: Selikor 4