RIO DE JANEIRO – Na edat di 58 aña e legendario futbolista brasilero Romario a disidí ku e ta bisti su sapatu di futbòl atrobe.

E kampion mundial di 1994 tin intenshon pa yuda e klup América de Rio de Janeiro, klup ku e ta presidí aktualmente tambe. E legendario atakante a retirá for di futbòl kasi 15 aña pasá.

“Mi no ta bai hunga tur wega di e kampionato, pero si algun di e weganan”, asina Romario a splika riba su kuenta di Instagram. “Di e forma aki lo mi por realisá un último soño: ku ta hunga huntu ku mi yu”. Su yu Romarinho a firma un kontrakt na mart último ku e klup.

For di yanüari Romario a keda eligí komo presidente di ‘América de Rio de Janeiro’. E propio Romario a militá pa un periodo kòrtiku ku e klup na 2009. Aktualmente e klup ta den e di dos divishon di e kampionato di Rio de Janeiro.

E temporada aktual ta programá pa kuminsá na mei i ta finalisá na ougùstùs. E kampion ta subi outomátikamente pa e kategoria mas haltu di e liga, unda klupnan manera entre otro Flamengo, Fluminense, Vasco da Gama i Botafogo ta forma parti di dje.

Despues di a retirá komo futbolista profeshonal, Romario a dediká su último añanan na polítika. Na 2015 el a wòrdu elegí senador pa promé biaha. Na 2022 el a keda reeligí.