Sean de Boer a indiká ku tur enkuestadó mester tene kuenta ku leinan di privasidat. 

Willemstad, — Senso huntu ku CBS ta kolaborá pa asina por kolekta informashon pa kontribuí na statistik nashonal. E kolekshon di informashon lo keda kompletamente anónimo i leinan ta protehá privasidat di tur siudadano.

Enkuestadónan di Senso lo kuminsá kolekta data durante e periodo di 2 di sèptèmber pa 20 di òktober pa asina por start ke konteo di habitante i bibiendanan aki na Kòrsou. Ta importante pa tin koperashon di pueblo riba esaki debí ku e informashon ku ta wòrdu kolektá lo yuda determiná e situashon ekonómiko, sosial i demográfiko i pa formulá maneho i programa adekuá pa fomentá bienestar di e pais i di su poblashon.

Algun pregunta lo ta lo siguiente: kon e konsentrashon di hende ku ta biba den área urbanisá òf den kunuku ta kambiando? Den ki área tin urbanisashon ta tumando lugá? Kon e poblashon ta distribuí geográfikamente? Kon e nivel di profeshon i nivel di enseñansa ta? Ki kambio tin den struktura di e poblashon pa loke ta sekso i edat? Ki diferensia tin entre diferente grupo di e poblashon pa loke ta mortalidat i fertilidat? Kua ta e karakterístikanan ekonómiko i sosial di e poblashon i di su forsa laboral?

E informashonnan aki no ta solamente yuda pa atministrashon públiko pero tambe lo kontribuí na e konosementu di siudadanonan. E informashon aki tambe por kontribuí na individualnan òf negoshinan pa por establesé negoshinan den sierto áreanan. Ku e informashon nan aki por determiná e karakterístikanan ku tin un influensia riba demanda pa bibienda, mobilario, kuminda, paña, fasilidat di rekreo, artíkulo médiko, etsétera. Huntu e kantidat di informashon aki ta sirbi pa mehorá e situashon ekonómiko i sosial di pais Kòrsou.

Senso huntu ku CBS pidi pueblo pa koperá ku e proseso aki pa asina por tin mió bista riba e situashon di komunidat di Kòrsou. Lo tin alrededor 750 enkuestadó ku badge ku lo pasa na total di 81 mil bibienda pa asina por kolekta informashon pa kontribuí na statistiknan lokal.  E formulario ta digital i por dura te ku 45 minüt pa yena dependé na e kantidat di persona ku ta biba na un kas. E formulario ta bini den 4 idioma: Papiamentu, Spañó, Ingles i Hulandes. Informashon ta keda anónimo sigun Lei di Statistik.

Direktor di CBS sr Sean de Boer a menshoná e importansia pa ku enkuestadónan tene nan mes na lei di statistik i hasi trabou diskreto i íntegro. Segun de Boer tin un sistema sumamente será ku ta prosesá informashon nan ku ta wòrdu kolektá for di e siudadano. De Boer a duna di konose den un entrevista ku Vigilante ku ta tuma e leinan ‘Ordenansa Nashonal di Statistik anto ‘Wetsbescherming Persoonsgegevens’ sumamente na serio.

Bou di e lei di ordenansa di statistik, tantu individualnan, organisashonnan i kompanianan ta obligá pa duna sierto informashon na institutonan ofisial pa prosesá informashon di statistik. Bou di e lei di ‘Wetsbescherming Persoonsgegevens’ ta duna na konosé ku e instansia ofisial ku ta kolekta informashon pa uzo di statistik por kompartí informashon nan privá solamente si ta traha statistik kuné. Esaki ta nifiká ku instanshanan ofisial por solamente uza statistiknan pa traha statistik kuné i nada otro. Enkuestadónan ta mara na lei ora di tuma informashon serka personanan na kas. Si no kumpli ku leinan ku ta protehá privasidat di individualnan enkuestadónan por paga un suma komo but te ku un kantidat i òf por asta wòrdu pèrsigui.

Pa averiguá si un enkuestadó ta representá e organisashonnan menshoná por hasi identifikashon dor di un badge. CBS i Senso ta yama un i tur pa duna aporte kompleto, ya asina nos por aportá na e statistiknan lokal kual ta sumamente importante pa desaroyo di nos pais i nos habitantenan.