WILLEMSTAD – Korte den Promé Instansia a disidí ku Refineria Isla Curaçao B.V. (Isla B.V.) mester paga Curaçao Refinery Utilities B.V. (CRU) 40 sèn na dòler merikano pa barí pa a almasená produktonan di petroli, no opstante no tabatin un kontrakt firmá. Esei ta e tarifa ku Korte ta konsiderá hustu pa Isla B.V. paga. Ta trata di un total di 33.426.008 dollar, ku CRU a eksigí. No solamente Isla B.V. mester paga e suma akí, pero tambe e interes legal for di 6 di òktober 2020. Manera Vigilante sa, e suma total ku Isla B.V. tin ku paga, ya ta deskontá ku un parti ku nan haña bèk despues di bende algun produkto. Pero ainda e kompania tin mas produkto almasená.

Korte dikta e sentensia djaluna último i asina pone un fin na un disputa legal kompliká entre CRU i Isla, despues di añanan di investigashon i prosedimentunan legal, relashoná ku e konflikto largu tokante pagamentu pa almasená produktonan di petroli den e refineria. E kaso tin di aber ku un kontrakt di fo’i aña 1994, den kua e kompania gubernamental Refineria di Kòrsou (RDK) a firma pa hür e refineria na Emmastad i e tambe e terminal na Bullenbaai, ku Petróleos de Venezuela S.A. (PDVSA).

E rais dje problema ta bai bèk pues te 1994, ora e kompania petrolero di estado venezolano PDVSA a tuma e operashon dje refineria lokal ofer. PDVSA a transferí su derechonan i obligashonnan di hür na 1994 mes pa su kompania yu, Isla S.A., ku tabata e operadó real dje refineria. Isla S.A. na su turno a funda e kompania Isla B.V. na 2007, i enkargá esaki ku maneho i eksplotashon dje refineria.

CRU ta un kompania yu di RDK ku na 2012 i ku pèrmit di PDVSA a asumí e maneho dje sentral di Build Own and Operate (BOO), ku mester a suministrá energia na e refineria. Curaçao Utilities Company (CUC) a konstruí e sentral akí den añanan 2001 pa 2003 i e tambe a manehá e sentral durante vários aña. For di 2011 RDK mes a manehá e sentral durante algun tempu. Na 2016 RDK a informá PDVSA i Isla B.V. di lo no prolongá e kontrakt despues di desèmber 2019 i riba 15 di yanüari 2020, Isla S.A. a entregá e refineria bèk na RDK.

Pero den e tankinan di almasená tabatin basta produkto di petroli ainda dje kompania Isla B.V. Riba e mesun dia di a haña e refineria bèk, RDK a enkargá CRU ku e maneho, i tambe e konflikto ku a surgi tokante e pago dje asina yamá “bewaarloon”. Esaki ta e suma pa almasená e produktonan. No a dura masha luna ku CRU a buska kaminda pa Korte pa kobra esaki, p’e periodo di yanüari 2020 te yüni 2021. CRU a hasi un demanda supstansial di un total di 33.426.008 dòler. Sinembargo, Isla B.V. a kontestá e demanda akí.

Isla B.V. a para ariba ku no tin niun kontrakt relashoná ku almasená produkto i a entregá kontra-demandanan, akusando CRU di komportashon ilegal. Tambe CRU a alegá ku mester a identifiká CRU ku e otro kompanianan CUC i RDK. Ku otro palabra CRU ta idéntiko na CUC i RDK. I ku CRU ta responsabel p’e demandanan di Isla B.V. kontra RDK. Isla B.V. a alegá ademas ku CRU a abusá dje diferensia di identidat entre e kompanianan embolbí.

Esaki a krea un lucha legal kompliká. Korte mester a analisá profundamente tur kontrakt kompliká, transferensianan di maneho i responsabilidatnan finansiero den e konflikto legal. Korte a tuma su tempu pa traha riba e puntonan klave ku tabata na base dje konflikto i a formulá un sentensia basta ekstenso konsistiendo di 10 página. Un dje puntonan klave tabata e akusashon ku CRU ta idéntiko na RDK i CUC. Korte a rechasá esaki, i tambe e akusashonnan ku CRU a aktua ilegalmente i sobrá ponensianan di Isla B.V.

Korte a konstatá sinembargo ku no tabatin un akuerdo firmá relashoná ku e “bewaarloon”, pero a husga ku por bisa sí ku tòg tabatin un akuerdo entre CRU i Isla B.V. tokante esaki. P’esei Korte a ordená Isla B.V. pa paga e suma kompleto ku CRU a claim, di 33.426.008 dòler. Korte a konsiderá e tarifa di 40 sèn dòler pa barí hustu i a rechasá tur opheshon di Isla B.V. kontra e “bewaarloon”. Ademas Isla B.V. mester paga interes legal for di 6 di òktober 2020, ku ta e dia ku CRU a entregá e demanda na Korte. Korte a skohe e fecha ei, pasó Korte no tin niun dokumento ku a palabrá un término di pago. Porlotantu Korte no sa ta for di kua fecha Isla B.V. ta fayando. Korte a para ketu tambe na e “beslag”-nan, ku CRU a pone riba kuenta bankario di Isla B.V. No opstante ku Isla B.V. a pidi pa lanta e esakinan na vários okashon, te ainda tin unu. Ya CRU a ehekutá dos kaba. Esaki ta pone preshon finansiero kontinuo riba Isla B.V. Pero Korte a rechasá e petishon i no a kita e “beslag”, pero netamente a ordená Isla B.V. pa paga e gastunan relashoná ku esakinan. Un total di 11.333,50 florin. Ademas e kompania mester paga algun shen florin pa otro gastunan mas chikí.