Hende muhé nan ta e víktimanan prinsipal di e gruponan aki.
PORT-AU-PRINCE – Un total di 3.494 persona a resultá víktima di asesinato, leshon i sekuestro na Haiti durante e seis promé lunanan di aña. Esaki segun un informe elaborá pa e Unidat di Derechi Humano di e Ofisina Integrá di Nashonnan Uní na Haiti.

E dokumento ta señalá ku durante di e segundo trimèster di 2023 a registrá un oumento di 14% den e number di víktimanan di asesinato, leshon i sekuestro relashoná ku gruponan armá, ku 1.860 víktima di e krímennan aki, kompará ku e trimèster anterior di yanüari pa mart 2023, den kua a reportá 1.634.

E mayor number di víktimanan a keda registrá entre luna di aprel i mei, ku 48% i e 34% di e kasonan denunsiá, debí na un oumento di e aktividat di gruponan armá i gruponan di outodefensa organisá pa e poblashon sivil.

E departamento di Oeste, unda e kapital ta situá, a sigui registrá e mayor number di personanan asesiná, heridá i sekuestrá, ku un 82% di e kasonan, manera e munisipio nan entre otro di Cité Soleil, Croix-Des-Bouquets, Petion Ville i Port-Au-Prince komo esun nan mas kastigá.

E violensia ademas a sigui ekstendé na e departamento di Artibonite, ku a akumulá 13% di e kasonan, prinsipalmente na e komuna nan di L’Estère, Liancourt i Petite Ribière di I’Artibonite.

Hustisia popular ta kontinuá
Entre dia 24 di aprel i 30 di yüni di 2023, un total di mas ku 238 presunto miembro di gruponan armá a keda asesiná pa sivilnan i gruponan di outodefensa mu a partisipá den un movementu denominá Bwa Kale, ku ta nifiká “eradiká”.

Segun e informe, frustrashon pa debilidat di institushonnan estatal, e residente nan armá ku machete i piedra a impedí di forma brutal e entrada den bario di e miembro di gèng nan.

E análisis di ONU ta atvertí ku hustisia popular no solamente ta violá e derechinan humano, sino tambe ta kore rísiko di kondusí un fragmentashon di e kapital na vários zona chikí.

A asta indiká ku debí na e dinámika di e strukturanan aki, e gruponan aki ta kore rísiko di kombertí nan mes den gèng nan nobo, debí na normalisashon sosial di agreshon di parti e poblashon, kua ta komprometé na hunga e papel di polis.

Entre aprel i yüni, 14 agente polisial a pèrdè nan bida den aktonan di violensia relashoná ku gruponan armá, miéntras ku 467 miembro di e gèng a muri komo konsekuensia di e kasonan aki, 238 den atake di poblashon, 119 den operashonnan polisial i 96 den violensia entre gruponan mes.

Sekuestronan ta sigui
Na nivel nashonal, un total di 298 persona a keda sekuestrá durante e segundo trimèster di 2023, loke ta suponé di ta un subida di 24%.

E 48% di e sekuestronan a keda produsí na e departamento di Artibonite, spesialmente na e kareteranan prinsipal di L’Estère, Liancourt i Petite Rivière.

E mayoria di e víktimanan a keda sekuestrá ora nan tabata biaha den vehíkulo nan di transporte públiko i algun muhé a keda raptá i violá durante nan sekuestro.

Violensia seksual
Dia 15 di mei, 15 hende muhé a keda sekuestrá i violá den e zona di Savien pa miembronan di e grupo Gran Rif, ora e tabata dirigí pa un merkado.

E gruponan aki ainda ta sigui uza violensia seksual, partikularmente e violashonnan kolektivo, pa asina sembra miedu i kastigá e poblashon bou di kòntròl di rivalnan i tambe kometé aktonan similar kontra hende muhé i muchanan ku ta biba den barionan bou di nan influensia.

Mei mei di luna di aprel, durante un atake kontra e poblashon di Brooklyn, 49 hende muhé a keda violá pa miembronan di G-9 i elementonan aliado den e zona konosí komo “Dèyè Mi”. Esaki intentando di hui di violensia armá.

Despues di keda violá, shete di e víktima a keda asesiná i nan kurpa a keda tirá na un sitio bandoná.

Dia 25 di mei, dos hende muhé tabata kushiná pa miembronan di un grupo i nan a keda violá den grupo i despues pegá ma kandela na bida. Esaki despues di keda akusá di kompartí informashon ku otro grupo di nan famianan.

E servisionan médiko, sikológiko i sosial ekonómiko na disposishon di sobrebibientenan di violensia seksual na Haiti, ta hopi insufisiente den e zona metropolitano haitiano i kasi ineksistente na e departamento di Artibonire, unda e gruponan ta uza violensia kada bes mas pa asina terorisá e poblashon.