E shofùr na momentu ku el a keda detené.

Cas Coraweg,– Den oranan di anochi den wikènt tras di lomba, outoridatnan mester a presentá na Cas Coraweg kaminda un konvoi lo a okashoná un aksidente. Demas investigashon polisial a diskubrí ku e shofùr dje konvoi tabata fuma, pues mesora outoridatnan a detené e shofùr.

Komo medida preventivo, mesora e kompania doño dje konvoinan, Que Chimba, a opta pa terminá kòntrakt di trabou ku e shofùr. Den un reakshon na Vigilante gerensha di e kompania a indiká ku e aksidente a tuma lugá despues ku enkargonan di “Que Chimba” a keda realisá, pues no tabata tin ningun kliente riba e konvoi. Mas aleu, e komportashon di e shofùr ta algu lamentabel pues a opta pa retirá e shofùr for di su funshon.

Afortunadamente ningun persona no a sali leshoná. Segun informashon e shofùr tabata manehá e konvoi bou di influensha di alkohòl, kaminda e mester a okashoná dos aksidente den e mesun anochi. E promé aksidente tabata na Gosieweg i e segundo aksidente a tuma lugá riba Cas Coraweg.

Pa loke ta trata e dañonan debí na e dos aksidentenan, Que Chimba, lo karga tur su responsabilidatnan. Tambe e kompania den nan reakshon a splika ku nan ta bai tuma medidanan nesesario pa asina evitá algu similar di sosodé den futuro. I por último, e bosero di e kompania a indiká ku nan ta spera ku den futuro por sigui konta ku konfia i por sigui brinda e nivel di servisio ku ta kustumbrá di nan.