Punda— Apesar ku turismo ta yegando nivel di 2019 bek, Kòrsou mester di divisa. Si Refineria Isla no logra rafiná krudo durante 2032, Kòrsou ta den un problema .  Na Kòrsou, entrada di divisa for di aktividat di rafinashon na refineria Isla a kuminsá baha for di 2018 pa motibu di ménos produkshon kompará ku 2017.

Esaki ta a konsekuensia di ménos suministro di krudo for di Venezuela. For di 2018 te ku 2022, aktividat Petrolero no a kontribuí na Produkto Nashonal Brutu miéntras Kòrsou a kuminsá importá produktonan petrolero. Por atribuí e oumento den importashon na prinsipalmente mas gastu na produkto petrolero na Kòrsou a konsekuensia di e oumento den preis internashonal di krudo.  Durante 2021 so, Kòrsou ya a importá 4 mion ton di kombustibel i derivadonan petrolero.

Segun e último reportahe di Banko Sentral, Reserva di divisa di Kòrsou (Union Monetario ku St. Maarten) ta bahando, pero no ta alarmante miéntras ainda e ta sigui hopi mas haltu ku e tèrmino mínimo di 3 luna. Esaki ta lokual sifranan kompilá pa CBCS Banko Sentral ta konkluí. Te ku medio 2022 e kota tabata kasi 7 luna ainda.  Segun Banko Sentral, e kobertura ku Kòrsou tabatin di 7 luna na 2020  a kuminsá baha i yega te na 6.6 luna di kobertura pa 2021. A spera e bahada kontinuá durante 2022 i tambe 2023. E bahada den kobertura tin di haber ku un kota mas haltu di importashon ku a surpasá e kresementu den reserva di divisa durante 2021 i kisas tambe na 2022. Esaki ta okashoná pasobra Kòrsou ta importando mas ku e ta eksportando pero tambe un oumento den preisnan di importashon, kousá probablemente pa oumento di transporte internashonal, a pone Kòrsou saka mas divisa marginalmente.

Segun Banko Sentral, durante 2022 tin bahada den kobertura ku por yega te na 6.0 luna na desèmber. E sifranan nobo mester Sali ainda. Esaki ta un bahada di 1 luna. E pronóstiko di e bahada ta sigui debí na oumento den kota di importashon kual efektonan lo kontinuá durante 2023 tambe. Esaki lo kousa un bahada general den e kobertura i bolsa di divisas.

E rafinashon na Kòrsou ta dependé di diferente faktor i tin rumornan ta sirkulá. Na promé lugá ta kuestionando si e grupo ganadó di e destaho tin e kapital disponibel i dokumentashon ofisial. Na di dos lugá un veredikto di wes a konfirmá pa di tres biaha eksigenshanan di medio ambiente i finalmente ta dudando den e estado tékniko di e planta riba Isla. Durante 2021 RdK a invertí  11.5 mion na trabou di kontratista riba refineria. Den 2022 RdK ta intentá na invertí mas ku 14 mion florin total den trabou di kontratista. E trabounan a enserá mantenshon grandi na fasilidatnan manera tanki i pipanan pa fasilitá suministro na Curoil i produkshon dor di Aqualectra. E sumanan menshoná no ta sufisiente pa start e planta.