Pik Pisas: kabinete Pisas II tin dos kompania potensial na liña pero no sufisiente pa generá 1800 kupo di trabou manera nan e antisipá.

PUNDA– – No tin muchu speransa pa re-apertura di Refineria Isla den su máksimo kapasidat. Anke kompanianan Global Oil Management i Oryx Petroleum ta bastante leu den nan kontrakt i pre-investigashonnan, Refineria Isla por lo pronto no ta bek den operashon.

Ougùstùs 2024 ta mustra un opshon pa Global inisiá ku produkshon di asfalt, pero esei no ta nada kompará ku epoka pre-2018. Manera ta konosí, riba petishon di Hunta di Konseho, gabinete Pisas II a amplia den su splikashon dje Presupuesto 2023 tokante e chèns pa refineria Isla ta operashonal atrobe. E gobièrnu ke diversifiká ekonomia ku reapertura di Isla, paso último añanan ekonomia a dependé riba solamente turismo. Ta kalkulá di forma kouteloso ku e reapertura lo krea 1800 kupo di trabou i ademas gobièrnu por risibí alrededor di 4 mion florin pa luna na entrada èkstra den e próksimo aña. Pero te ainda pa 2023, solamente Global Oil tin dos kontrakt firmá lokual ta leu for di 1800 kupo di trabou. Ta pronostiká ku Global ta krea entre 125 p 150 kupo i mayoria lo ta den CRU.

Lokual ta interesante pa Isla ta ku den region tin paisnan grandi ku ta produsí petroli. Si ántes Venezuela so tabata importante pa krudo pa nos refineria, awor Guyana i Sürnam tambe ta kombirtiendo den paisnan importante den eksportashon di petroli. “Tambe ta spera ku e eksportashonnan di petroli di Venezuela ta start bèk na su debido tempu. Ta importante pa un refineria ta hopi serka dje múltiple fuentenan di krudo. Hopi refineria rònt mundu a sera e último dékadanan, awor tin eskases di vários produkto derivá di petroli, manera asfalt i vários kombustibel. Seramentu dje vários refinerianan regional manera Aruba, Trinidad i Sto. Domingo ta pone ku tin ménos kompetensha pa e Refineria di Kòrsou.

Kòrsou tabata konta pa generá un mayor márgen bruto di refinashon (gross refining margin, GRM) p’e refineria. Den e époka di PdVSA esaki tabata rònt di 2 dòler pa barí. Awor den e kondishonnan aktual di merkado, e GRM ta banda di 5 dòler pa barí. E refinerianan rònt mundu ta hañando ganashinan signifikativo. Segun e aktual Gobièrnu den un nota di presupuesto na 2023, “tur e aspektonan menshoná aki ta hasi ku e posibilidat di habri refineria bèk muchu mas grandi ku algun aña pasá. Tin un “business case”.” Segun e kabinete Pisas II  ta den e sirkunstanshanan aki, Refineria di Kòrsou NV (RdK), huntu ku gobièrnu a inisiá e proseso nobo a base di un prosedimentu di “headhunting” pa por haña un sosio nobo pa eksplotashon dje refineria. E proyektonan anterior basá riba e Proyekto Arawak no a kondusí na niun akuerdo ku un sosio nobo. Manera menshoná na e momentonan aki ta na mesa Global ku apénas 200 kupo di trabou i Oryx Petroleum, kende a mustra mas interes den gas ku petroli, lokual tambe ta ménos kupo.

Segun gabinete Pisas II, si logra ku e refineria bolbe habri, lo krea mas di 800 empleo dirèkt i alrededor di 1000 empleo indirèkt. Ademas esaki lo krea mas aktividat ekonómiko pa por ehèmpel Kompania di Tou Kòrsou (KTK), e agentenan marítimo, proveedónan ètsera. Gobièrnu lo generá mas entrada atrabes dje impuestonan dirèkt i indirèkt i di e pagonan di dividènt. Pero te ainda, e sifranan ku Pisas II tin en mente ta leu for di alkanse. Hasta e proyekto di almasen na Bullenbaai ta kompletamente for di operashon.