Na mesa: Patrick Newton na mesa durante luna di desèmber ku eks representantenan di CPR Holding i di Socap. Ámbos kompania tabata risibí sèn di Knob Trading pa paga hür di Bullenbaai.

PUNDA— Hues mr van Leeuwen, den su veredikto riba e kaso di Caribbean Petroleum Refinery a kuestioná interes di e gruponan envolví den e diskushon. Den evaluashon di korte a bini dilanti duda riba e motibunan di diskushon, pasobra partidonan bringando pa e poder den e kompania CPR BV, no a duna por ehèmpel,  Refineria Isla importansha. E hues pa falta di un motibu di diskushon e.o. a opta pa no duna un desishon obligatorio.

E argumentu i duda di korte riba e diskushonnan tokante CPR i Isla ta haña sosten tambe si mira e desaroyonan kual ta indikativo ku tabatin mas interes den Bullenbaai ku e refineria mes. Promé ku e diskushonnan riba legalidat di dokumentashon na CPR a bira diskushon, for di ougùstùs 2022 ya kaba e grupo di CPR BV/Holding, Socap, Knob Trading i UPC (United Petroleo Corporation) a traha un struktura pa burla di Kòrsou.

 A uza un kompania panameño, UPC pa despista outoridatnan petrolero. Pa lokual ta trata e historia di UPC, riba 10 di febrüari 2021, via e notario Fabian Ruiz Sanchez na Panamá a laga establesé e kompania United Petroleo Corporation (UPC). Segun abogadonan di Raul Socorro na Miami, UPC, supuestamente mester ta propietario di e fuel oil den tankinan na Bullenbaai. E fuel oil tin un balor kalkulá di 40 mion florin. Pero aparentemente no ta UPOC ta propietario di e fuel oil ni tampoko Knob Trading.

Komo kapa, a bisa ku UPC supuestamente mester ta trafiká den miónes di dòler estado unidense na balor di krudo. Pero ora investigá ta sali na kla e kompania a keda establesé ku un kapital depositá di apénas 10 mil dòler na Panamá. UPC, huntu ku un kompania mas, Knob Trading SA a traha ku CRU i Refineria di Kòrsou pa almasena fuel oil na Bullenbaai. Esaki a tuma lugá bou di aprobashon di PDVSA na Venezuela. Segun e struktura pa entrega Fuel Oil na Bullenbaai, Knob Trading a ofresé su servisionan na United Petreoleo Corporation (UPC), kual último ta un kompania privá i ta kréditor di PDVSA. Segun UPC, PDVSA tin un debe mionario serka nan. UPC a risibi, komo un pago di debe, un kantidat di “zeta” prosedente di Venezuela. Segun e lista di kargamentu di e tènker Colon, tabata trata di 496 mil bari di (42 galon) di Fuel Oil, konsigna pa PDVSA S.A.. E tènker Colon a tuma e kargamentu na Amuay Bay . PDVSA a uza un ruta via atministrashon na Panamá, pa uza fasilidatnan na Kòrsou. Den e kaso aki, e kompania CRU di Kòrsou a pre finansia e struktura den forma di un lease na CPR. Caribbean Petroleum Refinery, tin òf tabatin un “all inclusive deal” ku CRU pa por uza e fasilidatnan na Bullenbaai. Esei ta enserá, nan mester paga un suma, kual ta inkluí tur kos, inkluso labor, ekipo i material.

A keda konstatá ku e fuel oil den tankinan di Bullenbaai no ta propiedat di Venezuela i tampoko di PDVSA, tampoko di UPC i tampoko di Knob Trading. Tabatin un transformashon di propiedat riba e fuel oil, despues di a sali for di teritorio venezolano i PDVSA no a risibi benefisio for di e pagonan. sino simplemente ta pagando su debenan na UPC. Den e relashon entre kompanianan, CPR tin un kontrakt ku CRU di Kòrsou i Knob Trading di Panamá. Den e kontrakt entre Knob i UPC, tin un klóusula menshoná pa obligá Knob konsiderá tur areglonan internashonal i atendé kumplimentu.

Problema a bini pa e grupo na momento ku e banko lokal, MCB na dado momento no a konfia e proseder di kumplimentu na Curaçao Petroleum Refinery i opta pa sera su kuentanan of aló ménos no ehekutá transakshonnan. Esaki a okashoná un problema pa CRU por a risibi pagonan di hür pa Terminal di Bullenbaai. Manera ta konosí, for di ougùstùs 2022, entre CPR i CRU tin un kontrakt pa hür na Bullenbaai. Tin diferente desaroyo saliendo na kla durante e kaso di investigashon penal tumando lugá, pa lokual ta trata supuesto falsifikashon kometé pa sosionan di CPR. E kompania Panameño, Knob Trading ta hungando un ròl grandi den finansiamentu di CPR pa entre otro por paga e hür mensual na CRU, Curaçao Refinery Utilities.  Segun un konseho hurídiko prosedente di e kompania na Miami Florida, InterJuris, aparte di Refineria di Kòrsou, Caribbean Petroleum Company i CRU, tin dos kompania mas tabata envolví den e transakshon di fuel oil na Bullenbaai. Ta trata di Knob Trading S.A.(KTSA) i United Petroleo Corporation (UPC). Riba 2 di ougùstùs 2022, CRU i Caribbean Petroleum Refinery BV, CPR a sera un akuerdo di entrega.  Segun e struktura pa entrega Fuel Oil na Bullenbaai, Knob Trading a ofresé su servisionan na United Petroleo Coporation (UPC), kual último ta un kompania privá i ta kréditor di gobièrnu Venezolano. Gobièrnu di Venezuela tin un debe mionario serka UPC. Kestion ta bira ken ta doño di e fuel oil den tankinan na Bullenbaai. Ta saliendo na kla, Knob Trading a sera un kontrakt ku CPR komo un “sup lease” pa e tankinan na Bullenbaai miéntras CPR a sera un kontrakt ku CRU pa e terminal na Bullenbaai.