Kana: Hernandez na man drechi ta kana ku unu di e mosketeronan Taborda, rumbo pa tratamentunan sivil den korte.

Nieuwe Haven—Javier Hernandez, eks direktor Refineria isla BV/PDVSA Kòrsou ta ligá ku e grupo di Caribbean Petroleum Refinery Holding. Esaki ta lokual por konkluí despues ku Hernandez na dos okashon a presentá ku miembronan di CPR Holding na Korte di Hustisia riba Nieuwe Haven.

Aparte di a presentá na Korte, tin korespondensha digital unda ta konfirmá ku Hernandez tabata intermediá pa e tres miembronan den CPR Holding, Raul Socorro, Leonardo Taborda i Marquez. Hernandez mes ta yama nan “tres mosketeros” den un interkambio ku e tabatin ku Luis Guisti, eks direktor di e grupo CPR BV.

Den korespondensha resien, ku a tuma lugá 3 di Yüli último, Hernandez a bolbe konfirmá su presensha.. Unu di e pruebanan ta regardá un korespondensha entre Hans Vissers, CFO di RdK i Javier Hernandez, konsehero òf kontakto di e grupo Socap di Raul Socorro. Durante e promé siman di Yüli, Hans Vissers ta manda un korespondensha pa Javier Hernandez, despues ku RdK a risibi un kuestionario largu for di Banco di Caribe. Vissers a manda e kuestionario pa Hernandez,  pa Hernandez por manda esaki pa Socap i asina fasilitá RdK ku kontestanan pa Banco di Caribe. Riba 3 di Yüli, Hernandez ta manda e karta di Vissers pa representantenan di Socap pa nan por kontesta e preguntanan mas lihé posibel di RdK pa por logra los sènnan di hür pa Bullenbaai, pegá na Estádos Unídos.

Hernandez públikamente a presentá ku Taborda na korte i saka foto ku abogadonan di Socap/CPR Holding. Tambe, Hernandez a papia ku Luis Guisti riba konstelashon di kompania Baranka Petroleum, kual kompania a keda establesé tambe pa e tres mosketeronan di CPR Holding. Den e kòmbersashon ku Guisti, Hernandez a splika Guisti riba motibu dikon a lanta un kompania mas kual a bira Baranka Petroleum.