Sali: riba e tènker Seasonator a manda e fuel oil kontrabanda pa subi teritorio estado unidense.

Nieuwe Haven—Eks sosionan di nashonalidat venezolano den e konsorsio di Curaçao Petroleum Refinery, no tabata na altura ku CRU/RdK a permití e fuel den tankinan na Bullenbaai sali. Ayera Vigilante a tuma kontakto ku nan abogado, Bertie Braam, kende a keda na bini bek ku un deklarashon.

Manera ta konosí i publiká komo primisia den Vigilante, e kompania estado unidense Grey Rock gathering and Marketing a paga kasi 10 mion dòler estado unidense pa por logra saka e fuel oil for di tankinan na Bullenbaai. E kompra a tuma lugá, despues ku sorpresivamente e kompania ku ta pretendé di ta propietario di e fuel oil, Lead Group di Panama a kanselá un kaso sivil kontra di CRU Kòrsou. E grupo Venezolano kendenan ta drentando Sali for di kortenan sivil na Kòrsou, ta bai tuma e pasonan nesesario. Ayera abogado Bertie Braam no tabata kier a bai den muchu detaye pero a konfirmá ku e ta bai reuní ku su klientenan pa averiguá kiko ta e siguiente paso.

Den forma eksklusivo Vigilante a publiká ku Grey Rock Gathering and Marketing ta e kompania estado unidense ku a paga pa e fuel oil den tankinan na Bullenbaai. Manera ta konosí, Assosciated Press a publiká un relato amplio riba e fuel oil kalifikando esaki komo un kontrabanda unda a burla di outoridat petrolero estado unidense OFAC. Grey Rock ta un kompania petrolero estado unidense ku ta manehá un refineria i terminal di bunker na Louisiana, Estádos Unídos. E kompania ta ofisialmente registrá na Houston Texas. Mediante nan representante legal Phelps Dunbar, nan a depositá e suma pa kual a kumpra e fuel oil riba un kuenta intermediario di e abogadonan.

E tènker nabegando bou di bandera di Hong Kong , Seasonator, despues di a keda for di 8 di februari na Kòrsou, 14 di febrüari a los for di e jetty na Bullenbaai. E barku ayera a yega St Croix unda e la kuminsá deskarga na e terminal na Lime Tree, ku ta unu di e terminalnan mas grandi den Karibe.

Seasonator a sali Kòrsou ayera 14 di febrüari den oranan di mainta despues di e kaba di karga e fuel anochi lat riba 13 di Febrüari. Bullenbaai no tabata por a logra pone 490 mil bari di fuel oil na tempu, despues ku e barku a keda na e Jetty s6 dia largu i hasta sufri manchanan serio. A keda konstatá ku

E fasilidatnan na Bullenbaai a konfrontá bastante problema pa kuminsá desbordá e fuel oil ku ta den tankinan na Bullenbaai for di Sèptèmber 2022. Fuentenan na Bullenbaai a konfirmá na Vigilante ku Seasonator a bin konfrontá tardansa serio na e terminal di Bullenbaai i inkluso a mancha barku ku mester a laga limpia esaki miéntras e tabata na Bullenbaai.  Operadornan na Bullenbaai a kuminsá manda e fuel oil riba 9 di febrüari i apénas dos minüt despues mester a stòp e kargamentu di e tènker debí ku tabatin un lèk den e brasa konektando e barku.

No tabata fásil pa logra haña un kumpradó, anke ainda e interogatorio ta keda awor ku e fuel oil lo subi teritorio estado unidense den tankinan na St. Croix. E probabel proseso lo bira pa mengua e fuel oil na St. Croix i kambia konstelashon di e produkto i no mester ekskluí e posibilidat ku e produkto parsialmente sin un aprobashon OFAC lo drenta estado unidense.  Seasonator su último destinashon tabata New York, Estádos Unídos promé ku e la yega Kòrsou.

Entretantu e eks sosionan den CPR BV, kendenan a keda den kòntròl di CPR Holding no a keda muchu kontentu segun fuentenan a revelá na Kòrsou. De fakto, tin unu di nan ku tabata na Kòrsou spesialmente pa atendé e findishi plania riba 14 di febrüari ultimo. Sorpresivamente, abogado mr Eric de Vries a kanselá e findishi i ayera Refineria di Kòrsou a konfirmá di a bende e fuel oil.