Pik: Minister Presidènt Pisas a trese dilanti ku e lo laga RDK pone algun dokumento.

PUNDA—Parlamento di Kòrsou a posponé un reunion importante riba Refineria Isla i búskeda di un sosio stratégiko. E reunion ta plania pa tuma lugá despues di vakashon. Entre Yüni último pa Yüli, tabatin hopi desaroyonan importante ku a tuma lugá tantu pafó komo paden di korte, ku ta pone Refineria Isla komo prioridat den Parlamento pa tratamentu.

Manera ta konosí, presidente di Parlamento Charetti America-Francisca a konvoká e debatenan ku gobièrnu tokante dos tema ku tin di aber ku refineria. Ta trata di e petishonnan di Parlamentarionan Giselle Mc William di MAN, Rennox Calmes di TPK, Quincy Girigorie di PAR i Michelangelo Martines di KEM pa debatí tokante e karta pa eskoho di ‘preferred bidder’ pa operashon di refineria.  I tambe e petishon di frakshon di PAR pa un reunion públiko ku karakter di urgensia tokante e kontenido inkriminatorio di e rapòrtnan forénsiko relashoná ku negosiashonnan di Refineria di Kòrsou NV (RDK) i Curaçao Petroleum Curaçao (CPR).  E reunion tabata planiá pa start 9’or di mainta riba 19 di yüni. Pa ámbos tópiko e Presidente a stipulá e tempu pa papia na 15 minüt den e promé tanda i 10 minüt den e segundo tanda. Parlamentario Mc William mester a manda un di dos karta p’e Presidente di Parlamento, rekòrdand’e riba un karta di oposishon di dia 23 di febrüari último ku e petishon pa e reunion públiko riba e karta pa eskoho di ‘preferred bidder’ pa operashon di refineria. E tabata ke pa yama e reunion pa kaba.

Aparte di e desaroyonan den korte tin un bidder mas na boka di riu ta warda. GIK, di grupo Martha. GIK ta akusá dos Minister di gabinete Pisas 2, ku probablemente a influensiá e proseso di tal forma ku no a skohe GIK komo e asina yamá ‘preffered bidder’. Segun e Parlamentarionan esaki sigur ta un akusashon fuerte kontra gobièrnu i ta tacha integridat di e proseso di eskoho pa un operadó di refineria. Pa e operashon di refineria ta di gran importansia eksigí profeshonalismo, integridat i sinseridat di parti gobièrnu.  Ademas Parlamentarionan Quincy Girigorie, Steven Croes i Ana Maria Pauletta a pidi America-Francisca pa konvoká un reunion públiko ku karakter di urgensia pa haña splikashon konkreto di Minister Presidènt Gilmar “Pik” Pisas tokante dje kontenido inkriminatorio di e rapòrtnan forénsiko relashoná ku negosiashonnan di RDK i CPR.

Den nan petishon por eskrito e Parlamentarionan ta mustra bèk riba e echo ku durante e reunion públiko di 16 di yanüari último tokante e tema ‘desaroyonan di negosiashon pa apertura di refineria’, Minister Presidènt Pisas a trese dilanti ku e lo laga RDK pone algun dokumento relashoná tokante e reunion “ter inzage” di Parlamento. Esaki ku e Parlamentarionan ku ke por tira un bista den e dokumentonan, na un lokalidat i riba un fecha apuntá pa RDK. A pone e dokumentonan akí “ter inzage” di Parlamento entrante e siman di 20 di mart último, na ofisina di RDK.

Girigorie i algun parlamentario mas a hasi uso di nan derecho di tuma nota dje dokumentonan. Despues ku mas di 2 siman a pasa den kua tur miembro a haña oportunidat pa por tuma nota dje dokumentonan poné na disposishon di Parlamento, Girigorie a aserká Presidente ku e petishon. “Mirando ku no por a tuma nota dje dokumentonan durante di e reunion públiko, Parlamento no a haña e oportunidat pa debatí riba kontenido di e dokumentonan akí durante e reunion públiko, manera ta usual.” E informashonnan ku Girigorie a tuma nota di dje i ku el a kompartí ku miembronan dje frakshon, ta di índole asina grave ku pa Girigorie mes, Croes i Pauletta ta altamente urgente i nesesario pa Parlamento kompleto deliberá ariba. Lo mester deliberá riba e konklushon ku por saka for di e dokumentonan akí, pero prinsipalmente e rapòrtnan relashoná ku e investigashon forénsiko di e dokumentonan falsifiká. “Deliberashon di Parlamento den su totalidat ta bira ainda mas urgente i nesesario, momentu ku tuma nota ku informashon ku gobièrnu a suministrá na Parlamento.

Entretantu a inisiá prosesonan den korte ku tambe ta influensha e reunion di parlamento. Tin dos kaso di beslag den proseso i aprobá pa korte miéntras tin un proseso a fondo. Sosionan den CPR i Socap, e dos kompanianan envolví den e bid, ta den problema serio i akusashonnan a kuminsá kai for di ámbos banda. E desaroyonan entre Yüni pa Yüli i pa momento e reunion tuma lugá, ta kambia direkshon di e preguntanan. Refineria di Kòrsou, lo no tin un dia fásil den parlamento.