E sifra di mortonan entre tantu a alkansá 32.

SANTO DOMINGO – E mortonan pa eksploshon i posteriormente kandela registrá den oranan di siman pasá na San Cristobal, Repúblika Dominikana, a oumentá i alkansá 32. Esaki segun loke a keda informá pa e Sentro di Operashon di Emergensia.

Te ainda, a logra identifiká 13 di e kurpanan sin bida, di kua 11 a keda entregá na famianan. 

E organismo, ku e dia promé a informá di 28 morto den e kaso aki, a señalá ku di e 59 heridonan reportá for di inisio di e emergensha, solamente 12 ta ainda interná den sentronan médiko, tres di esaki nan den kuido intensivo.

Na mesun momentu a informá ku ta sigui ku e investigashonnan di loke ku a sosodé, aunke ku Ministerio Públiko a indiká di tin evidensia ku ta komprometé esun nan responsabel, pa nan akshonnan ku a kousa morto i provoká pèrdida nan mionario den e eksploshon aki.

E órgano akusado, a afirmá den un komunikado, ku nan tin prueba di ku na luna di mart pasá, e empresa Vidal Plast, unda e kandela a keda registrá, tabatin un kandela provoká pa kontakto entre chispa i kímiko nan i esun nan responsabel no a tuma niun akshon.

Den e òrdu aki, COE a indiká den nan informe di fin di siman tras di lomba, ku brigada nan ta kontinuá kitando restunan for di e sitio di e aksidente, unda te ainda, a sa di move 800 tòn di restunan i materialnan sólido.